Praise On 2017-a tel tumte tan vawiin thleng

Synfo-in a buatsaih tur, Praise On - Group Zai Intihsiaknaa tel turte tan vawiin thlengin inziah luh theih a la ni. Group Zai Intihsiakah hian pakhatnain Rs. nuai khat an dawng ang.

Praise On 2017 - Group Zai Intihsiak hi September 26 aṭanga 30 chhung hian audition round neih a ni ang a, hemia tel turte tan vawiin thleng hian ziakin Synfo Office, Synod Office Annexe-ah thehluh theih a ni. Intihsiaknaah hian Pathian fakna hla, Mizo ṭawnga sak tur a ni a, Kristian Hla Bua mi hla sa turte tan chei kual vak a remchang dawn lo. Hei bakah hian round zawnin hla ngai sak phal a ni lo. A tel tur, group-a member-te hi KṬP member, Kohhran dan zawhkim, Kohhran dan chhunga awm an ni tur a ni.

Group tinte zai hun tur hi September 22 zan dar 8:30-ah Hruaina Êng TV aṭanga puan chhuah tur a ni a, office hun chhungin zawh theih a ni bawk. Audition round-ah hian hla duh ber pakhat sak tur a ni a, thunawn nei a nih chuan chang hnih leh a thunawn sak tur a ni a, thunawn nei lo a nih chuan chang thum thleng sak tur a ni. Musical instrument hman phal a la ni dawn lo a, a hâng (acapella)-a sak tur a ni ang.