ASI Aizawl Circle hawn a ni ta

Union minister of state for Culture Dr Mahesh Sharma chuan Septembner 16, Inrinni khan Archaeological Survey of India (ASI), Aizawl Circle din thar chu Tuikhuahtlangah a hawng. Hawnna inkhawmah hian Governor Lt. Gen. Nirbhay Sharma leh Art & Culture minister R Romawia te pawh an tel.

Dr Mahesh Sharma chuan, hnam ziaráng leh hun kal tawha thlahtute nun hman dante chu hnam rohlu a ni tih sawiin, "Heng hnam rohlute hi ram leh hnam chakna pakhat a ni," a ti a; hmanlaia hnam rohlute chu vawnghim tur leh a tihhmawsawnna kawngah ASI-in nasa taka hma a lak thu leh ASI Aizawl Circle hawn thar chuan nasa lehzualin hnam rohlute vawnhim kawngah India hmarchhak state-te tan hmasawnna a thlen ngei a beisei thu a sawi.

Mahesh Sharma chuan, sorkar laipuiin India hmarchhak state-te tan kawng hrang hrangah hmasawnna chak zawk a thlen theih nan hma a lak thu a sawi a; kum 2022, India-in zalenna a sual chhuah aṭanga kum 75-naah New India siam tum a nih thu sawiin, chumi thleng tur chuan khua leh tui zawng zawngte ṭan la turin a sáwm a ni.

Governor Nirbhay Sharma pawhin thu sawiin, Mizo zingah pípûte aṭanga inhlan chhawn hnam ziaráng leh zemawi nghet tak a awm tih sawiin, "Hun kal tawha nun hman dan leh inrelbawl dan chiang zawka hre turin an kalsan thil hluite zawn chhuaha zirchian a ngai a ni," a ti a; Vangchhia leh hmun danga hmanlai sûlhnu hmuh chhuahte chu zir chian a, ngaihhlut nacháng hriat pawimawh thu a sawi.

Larsap chuan, ram hmasawn turin mipui an ṭan rual a, mimal tinin an theihna ṭheuhah ṭhahnemngai taka thawh a ngai tih sawiin, "Kawng engkimah sorkar tihsak nghak loa theihna leh thiamna kan hman ṭhin a pawimawh," a ti.

Art & Culture minister R Romawia chuan, Mizoramah kum 1894-a Welsh missionary-te'n Mizo hawrawp an siam hmain Mizo history ziaka chhinchhiah mumal a awm lo tih sawiin, "Tih tak taka kan pipute sûlhnu kan zawn chuan kan history tihausa sawt thei tur hmuh chhuah belh tam tak kan nei ngei dawn a ni," a ti a; ASI Aizawl Circle hawn a ni chu Mizoram tan ni chhinchhiah tlak a nih thu a sawi.

ASI Aizawl Circle hawnna inkhawmah hian INTACH Mizoram Chapter convener P Rohmingthanga, ASI regional director Dr M Nambirajan, ASI additional director general Rakesh Singh Lal leh, assistant superintending archaeologist Dr Sujeet-te pawhin thu an sawi.

ASI-in tun hnaia Mizorama hma an lakna hrang hranga preliminary report an siam chu tlangzarh a ni a; Tripura, Manipur leh Mizorama ASI-in thil hlui an laih chhuah leh hun kal tawh sûlhnu an hmuh tharte pholanna Photo Exhibition buatsaih a ni bawk.

ASI Aizawl Circle hi Guwahati Circle aṭanga indang a ni a, Mizoram bakah, Mani­pur leh Tripura-te a huam dawn a, Superin­tending Archaeologist-in a ṭhutchilh dawn a ni.