No smoking sticker târ beihpui thlak

Mizoram State Toba­cco Control Society (MSTCS) leh an thawh­puite chuan tunlai hian Mizorama district tinah mipui phur lirthei (public transport vehicle)-ah meizuk khap a nih thu tarlanna, 'No Smoking Sticker' târ beihpui an thlak mek.

MSTCS aṭanga thu dawn danin, taxi, maxi­cab, bus, auto-rickshaw leh mihring phur chi lirthei dangahte The Prohibition of Smoking in Public Places Rules, 2008 Rule 3 (1) & (2)-in a phût angin meizuk phal a ni lo a; meizûk phal loh a nih thu leh zu lui an awm complaint thehluhna tur târ ngei ngei tur a ni. Meizûk kaihnnawih hmanrua - ashtray, nawh­alh leh lighter-te chhawp khap a ni bawk.

Danin a phût ang sticker tàr hi motor neitu emaw, a enkawltu (driver) emawte mawhphurhna a ni a, tàr loh chu dan bawhchhiatna a nih avangin dan anga hrem theih a ni. Dan hi zawm ṭhat a nih theih nan leh mipui hriselna tihhmasawnna kawnga ṭhahnemngaihna leh a bul ṭan nan MSTCS leh TATA Trust hnuaia Centre for Microfinance and Livelihoods (CML) leh North East Initiative Development Agency (NEIDA)-te chuan sticker-te an siam a ni.

No Smoking sticker-te chu public transport vehicle zawng zawnga tàr turin State Transport Authority (STA)-in December 13, 2016 khan a remti tawh niin MSTCS chuan an tarlang. Sticker chu July 18, 2017 khan DGP Thianghlima Pachuau-in a tlangzarh a, district tina SP-te'n an district ṭheuha public transport vehicle-a târ vek turin thuchhuah an siam a ni.

Transport department pawhin August 18, 2017 khan public tran­sport vehicle neitu leh mawh­phurtu zawng zawngte chu an lirtheiah meizûk khap tur leh zu lui an awma complaint thehluhna tur chuanna sticker tár vek turin thupek a chhuah bawk.