VC nghet dah a nih theih nana ṭan la turin Mahesh Sharma ngen
Mizoram University Teachers' Association (MIZUTA) hruaitute chuan September 16, Inrinni zing khan Union minister of state Culture, Environment, Forest and Climate Change Dr Mahesh Sharma hmuin, MZU-ah vice chancellor nghet dah thuai a nih theih nana hma la turin an ngen.
MIZUTA hruaitute hian Union Minister hnenah hian lehkha pein ngenna an thlen a; kum hnih dawn MZU-in VC nghet a neih tawh loh vangin MZU zirlaite'n September 6, 2017 aṭangin lungawi lohna an lantir thu leh zirna chhunzawm a nih loh thu an ziak.
MIZUTA chuan, VC nghet dah an phût chungchangah press conference an neih tawh thu te, Human Resource Development ministry-ah ziaka an thlen tawh thu te, Mizoram Governor (MZU Visitor) hnenah an thlen tawh thute an sawi a; chuti chung chuan, tun thlengin VC nghet dah a la nih loh thu, Dr Mahesh Sharma chu an hrilh.
Dr Mahesh Sharma hian Human Resource Development Minister Prakash Javadekar a biak tawh thu, MIZUTA hruaitute a lo hrilh a; Inrinni vêk khan telephone-in India President office biak nghal a tum thu a sawi bawk.