Sorkar department intihsiakna khâr

Mizoram Civil Services Sports & Cultural Association-in ni nga awh, 30th. Annual Sports Meet 2017 (Inter-Departmental) an buatsaih chu Inrinni khan R Dengṭhuama Indoor Stadium-ah khâr a ni a, Sports & Youth Services minister Zodintluanga'n a hmanpui.

Zodintluanga chuan, infiamna lama thiamna leh theihna vanga ṭhalaite sorkar department-a hna thawhna remchang petu department hrang hrang hnenah lawmthu a sawi a, "Sports Meet hian department hrang hrang thawktuteah thawhhona ṭha siam se, chu chu mipuiin chhawr se ka duh a ni," a ti.

Ṭhalai infiammite chawisan an ni chu lawm­awm a tih thu sawiin Sports Minister chuan, "Ṭhalai player chhuanawm, sport lama tih ṭhat vanga eizawnna nei tam tak an awm," a ti a; muster roll-a hna lak a har chungin, infiamna lama ti ṭhate chu department hrang hrangin an duhsak ṭhin thu a sawi.

30th. Annual Sports Meet 2017 (Inter-Departmental)-ah hian medal 32 dawngtu Police department chu pakhatna an ni a; pahnihna chu PHE department niin, medal 12 an la a, pathumna PWD-in medal pasarih an la a ni.