Sorkar department-te'n GMR an ráwn tâwk lo

Mizoram sorkara department hrang hrangin office, quarters leh thil dangte an sak dawnah Geology & Mineral Resources (GMR) department-a mithiamte an ráwn tâwk lo tih GMR department hotute chuan an sawi.

Vanglaini palaiin a kawmnaah GMR department hotute chuan, in sakna tur hmun a him leh him loh hriat chian hmasak a ngaih viau laiin, sorkar department tam zawkin building an sak dawnah GMR mithiamte an râwn tam tawk lo tih an sawi a, "Chhiatna a thlen hnuah chauh GMR-a mithiamte an ráwn leh tho ṭhin a, a let tam takin sum sen a tam phah ṭhin," an ti.

Sorkar department-te tan bakah, mimal in sa turte tan pawh GMR mithiamte chu ràwn theih an nih thu leh, in sak hmain râwn ngei ṭhin se a ṭhat thu an sawi a ni.

GMR hotute chuan, hmasawnna hna thawh hrang hrang - lei dawh, in sak, tuikhuah, mipui punkhawmna tur hmun lian sak leh thil dang dangah a hmunhmá chu a him leh him loh enfiah hmasak ngei a ṭhat thu an sawi a, "Sorkar department ṭhenkhat leh contractor-te'n lei an dawh dawnah pawh a ban phunna tur zirchian hmasak a nih loh chuan páwn lam lan dan anga ban phun ringawt a him loh avangin, a hnuah chhiatna a thlen leh phah fo a ni," an ti.

GMR hotute sawi danin, leilung leh a chhehvel himna leh zir chian dân chu hlawm parukah ṭhen a ni a; minor mineral - quarry & sand, underground water, landslide engineering and disaster, geo-techinical, earthquake & seismology leh oil & natural gas-ahte an ṭhen a ni.

GMR-a mithiamte râwntute tana hna an thawh dawnah senso ngai a awm ṭhin tih sawiin, "A hmunhma enfiahna te, map siamna te, contour survey, lei verh, phai lama sample thawnna man, diesel, oil, tui leh hlawhfa chhawrnate a ngai a; hengte hi schedule of rate anga kalpui vek a ni a, a bâk chu sorkar mi an nih anga kan thawh tur a ni," an ti. Anmahni ráwn lo a, sum tam tak sénga GSI lam ráwnte pawh an awm niin an sawi.

GMR hotute chuan, leimin tur ven nan checkdam a pawimawh hle tih an sawi a; kum 1983-ah Aizawl Ramthar Veng (Sihpui)-ah lei tla­hniam a awm ṭan a, kum 10 hnu, 1993-ah a tlahniam leh tih sawiin, Geology & Mining hotute rawt ang­in, kum 1994-ah RCC checkdam siam a nih tâk avangin tunah chuan a ṭha tawh hle tih an sawi bawk.

Leilung sawngbawl danah Mizo mipuiin hriat tur an ngah a, an tih turte an tih tâwk loh thu sawiin GMR hotute chuan, "Chhiatna tam ber hi tui paihna dik loh vang a ni. Mipuiin tui chhe paihna kan siam ṭha tawk lo a, in ṭha tak tak sate pawhin tui paihna an ngaihthah fo," an ti a; tuidawn siam nacháng hre lote pawh an awm thu an sawi.

Sihhmui leh Lengpui inkar Tlawng luia lei dawhnaah geologist-te ràwn an ni lo tih sawiin GMT mithiamte chuan, "Ban an phun ringawt a, a chhung rilah ban dinna tlak lei nghet a awm loh avangin a ding chhe mai mai tawh dawn niin a lang. A leilung awm dante zir ila, tuiin engtin nge a lak hêk dawn, a hnuaiah eng balu chi nge awm, tihte nen zir chian hmasak ngei tur a ni," an ti.

Contractor leh department ṭhenkhat chuan GMR mithiamte an ráwn ve zauh zauh tih sawiin, Reiek kai lei dawhnaah te, Teirei Hydel Project, Serlui-B Hydel Project leh State Referral Hospital-ahte an tih an sawi a; quarry neittute'n chhiah chawi an hreh hle niin an sawi bawk.

DMR department hian nikum 2016 aṭangin 'Delineation of urban development zones with special reference ti landslide risk unslope stability within Aizawl city map" tih an buatsaih ṭan a, June 2018 velah an zawh hman an inbeisei a ni.