City tan goal khung a harsa lo

Manchester City-in goal khung an harsat lohzia an pholang nawn leh ta - Inrinni zan khan Premier League-ah mikhual tlangnel zia an chhuah a, an mikhualna ramah Watford chu 6-0 ngawtin an sawp. City hian inelna hrang hranga an match hnuhnung pathumah goal 15 an khung a, goal chhuah an nei lo.

City tan ṭum dang ang bawkin Sergio Aguero chu a 'changtupa' a ni a, Argentine striker hian hattrick a siam - Aguero bakah hian Gabriel Jesus, Nicolas Otamendi leh Raheem Sterling te chuan goal khat ṭheuh an khung bawk.

City = goal

Watford khelmualah goal hmu turin rei nghah a ngai lo - minute 27-naah Sergio Aguero a inlar a, Kevin de Bruyne freekick a tauh lut. Minute li a liam a, Aguero bawk kan hmuh chhunzawm - Argentine striker hian Jesus leh David Silva te nen mawi taka ball an inpek kual hnuah a goal hnihna hi a khung.

Minute 37-naah Aguero-a'n Jesus tan hna ṭha a thawhsak ve zui a, Brazilian forward hian tun season-a a goal ngana ni turin Aguero-a ball siamsak chu a khung. Chawlhlawk hman a nih hnuah Watford-in harhna an chang a, Andre Carrillo leh Richarlison hmangin hun ṭha an nei. Mahse, goal khungtu erawh City bawk an ni a, Otamendi leh Aguero ten goal khat ve ve an khung leh hnuah Sterling chuan ama penalty hlawhchhuah chu goal-ah a chantir.

Mihlim Pep

Manchester City-in Champions League an khel chau a, khualmualah Feyenoord 4-0 in an sawp. Mikhual rama zin an nih avangin City player-te an chau tura ngaih a ni a, mah se an chauh loh zia goal hmangin an lantir. City boss Pep Guardiola chuan, "Match ṭha tak a ni. A bik takin khualmuala Champions League khelh zawha khatianga kan khel thei kha ka lawm a, kan hlim takzet a ni," a ti.

City boss chuan sawi chhunzawmin, "Barcelona ka enkawl thei kha ka inchhuang ṭhin a, mah se tun kara City-a kan goal khung zozai hi chu a tam a ni," tiin Catalan club-a an vanglai ai maha an khelh ṭhat thu a sawi - Watford khelmualah hian shot 28 an nei a, David Silva-a'n 88 touch neiin 93% a pass dik a, assist pahnih a nei bawk.

Record hnaihtu Aguero

City tana goal khung hnem ber chu Eric Brook a ni a, 1928 leh 1940 inkarah goal 177 a khung. Aguero-a'n kum 2011-a City a zawm hnuah goal 175 a khung ta a, City tana goal khung hnem ber dinhmun luah turin goal thum chiah a mamawh ta - record a siam ngei a beiseiawm hle. England winger hlui Brook-a'n goal 177 khung turin match 494 a mamawh a, Aguero-a'n goal 175 khung turin match 259 chiah a mamawh thung.

Guardiola chuan, "Record hi a siam thuai ka beisei a, hlim takin kan lawm thei ang. Aguero hi legend a ni a, he club chanchina hriatreng tawh tur a ni. A statistic hian a chanchin a hrilhfiah vek a, player ropui tak a ni," tiin a nau chu a chhuang hle.