Zaninah Dinthar Vs Police

Mizoram Premier League Season 6-ah Dinthar FC leh Mizo­ram Police ten chak an la nei lo a, zanin dar 7:30 hian point thum hlawhchhuah tumin Lammualah an inhmachhawn ang.

Dinthar FC hian an match hnu­hnung berah Bethlehem Vengthlang FC lakah point khat an sual chhuak a, MPL kai thar Police an hneh theih chuan semifinal kawng a inhawng dawn tih an hria. Chuvangin zanin hian Maimawms-in tha pui an chhuah ang.

Dinthar forward Jackson Victor-a'n match hnuhnung berah goal a khung bakah penalty a hlawh chhuak a, Nigerian forward hi Mizoramah a tlangnel ṭan tih a hmuh theih. Coach Lalhlupuia Sailo hian Nigerian midfielder Clarence Carter bakah MPL-a tawnhriat nei ṭha Samuel Laltlanthanga, Malsawma Chhangte, R. Lalthantluanga (Lalmama) leh MPL best keeper nilai Malsawmdawngzela te an nei a, Police laka zam tur an ni lo.

MPL season hmasa berah Police hi champion tura ngaih an ni a, amaherawhchu Dinthar hian round 9-ah injury time-a Lalmama thawhrah zara R. Laldanmawia goal hmangin an chak. Hemi hnu hian Mizoram Police hi an par chhuak hlei thei tawh lo a, Mizoram awptu Police hian MPL6-ah phei chuan nomawi an beisei ngam tawh lo - season ṭantirh aṭanga an tum ber nia lang chu relegate pumpelh a ni.