Rinkai Reds leh Spurs chak zo lo

Premier League club zinga Champions League khel phak Liverpool leh Tottenham Hotspur ten Inrinni zan khan league match khelin an mikhual lakah point thum an hlawh chhuak zo lo. Reds leh Burnley te 1-1 a an inhnehtawk laiin Spurs pawhin Swansea City lakah goal an khung thei bik lo.

Kum 2003-04 hnu lam Premier League bikah club pahnih tan zan duhawm lo a ni. Tottenham hian ball possession (75%) an chan hnem ber ṭum an tawng. Liverpool pawhin goal attempt an neih hnem ber ṭum (35) an tawng bawk. Mahse, champion tum pahnih hi point khatah an lungawi a ṭul.

Coutinho telna Reds

Liverpool ten an khelmual hmanthiam Anfield kum 125-na tlin champha an lawm a, inkhel ṭan hmain khelmual chhunga 'Kop' awmkhawmte chuan an hlapui 'You'll Never Walk Alone' sa rualin an ṭhutna pawh 'YNWA' tih sign lang theiin an rem.

Reds tan hian Barcelona-in an lak chhuah theih loh Philippe Coutinho-a'n season kal laia a vawi khat nan league match bikah inkhel bul a ṭan a, Manchester City an hneh loh ṭuma hnawhchhuah Sadio Mane erawhin hremna a hmang ṭan thung.

Burnley tan ṭum dang zawng aiin Anfield a inkhelh a chak awm loh. Mahse, Premier League season ṭan nia Chelsea an hneh hnua Tottenham laka point khat hmu thei team hian midfielder Scott Arfield hmangin minute 27-naah goal hmahruai an khung a, minute thum hnu lekah AS Roma

aṭanga an lakluh thar Mohamed Salah chuan an siphurh a sut.

Inkhel thunun chungin Liverpool lamin goal dang an khung belh thei lo a, substitute Dominic Solanke-a'n bar a volley per tih mai loh chu vawi 30 chuang goal attempt nei mah se Roberto Firmino, Daniel Sturridge leh Salah te an vannei nawn tawh lo. Burnley defender Ben Mee-a ball tauh chu Joel Matip-a'n goal line

aṭangin a tauh chhuak a, Reds hi chak lo thei an ni.

Liverpool manager Jurgen Klopp chuan an result vangin a lawm loh thu a sawi a, chutih rualin a naute khelh danah erawh a lungawi thung. German coach chuan, "Inkhel kan thunun a, kan huaisenin kan thawkrim bawk, mahse goal khat chiah kan khung. Reds ka zawm hnuah Burnley laka kan khelh ṭhat ber ṭum a ni," tiin a sawi.

Brazil international Coutin­ho chungchang sawi zuiin Klopp chuan, "Philippe khan a khel ṭha hle a, a tirah chuan lakchhuah ka tum lo. Mahse, thutlukna hran siam a ngai ta zawk a ni," a ti. Coutinho hi minute 78-naah Dominic Solanke-a'n a rawn thlak a ni.

Wembley lamah chuan

White Hart Lane sak ṭhat mek a nih avangin Tottenham-in home match khelh nan Wembley Stadium an hmang a, Mauricio Pochettino nau ten an khelmual lailawkah hian league match bikah chak ni hmel an la hmu lo.

Everton laka goal hnih khung­tu Harry Kane-a'n cross­bar a tih per a, England inter­national striker thlawptu Christian Eriksen leh Dele Alli ten an hunṭha an khawhral bawk. Spurs hmatawng inman tak Kane, Alli leh Eriksen te inkawp dang theitu Swans keeper Lukasz Fabianski-a'n a club tan point khat a dang chhuak a tih theih.

Tottenham tana season duhawm hmang mektu Ben Davies chu bench-ah dah niin Dortmund laka goal khungtu Son Heung-min chu left wing back-ah dah a ni a, South Korea international hi inkhel chawhnu lamah tawlh hmatir ni mah se danglamna a siam phak lo.

Spurs hian Champions League group stage-a an mikhual Borussia Dortmund lakah ball chang tlem zawk chungin hnehna an chang thei. Swansea lakah erawh ball possession 75% niin goal shot ṭum 26 nei mah se pakhatmah a lut lo. Spurs hian an khelmual bikah league match an khelh hnuhnung vawi 30 a an pet goal lohna hmasa ber a ni.

Tottenham manager Mau­ricio Pochettino chuan, "Hneh­na chang turin tih ngai apiang kan tikim vek a, goal kan khung thei tlat lo kha a mak a ni. Ka naute an khel ṭha a, hun ṭha pawh an insiam hnem hle, a khaikhawm nan chuan kan vanneih ṭum kan tawng lo a ni," a ti.