Hotupa berin AR hmun a hawn chuan AR-te an insawn turah kan ngai - CM ; ZMC ṭhatna tur atan la turin central ngen

Chief minister Zoramthanga chuan, Assam Rifles-te chu Zokhawsanga an hmun thar hawn a nih hnuah chuan Aizawl khawpui laili aṭangin an insawn ngei tura an ngaih thu a sawi a; sorkar laipui hnena Zoram Medical College (ZMC) hlan an duh chhan chu medical college ṭha zawk duh vang a nih thu a sawi bawk.

CM Zoramthanga hi chawlhkar khat chuang thangin New Delhi-ah a zin a, sorkar laipui hotu hrang hrang a dawr hnuah September 24, Inrinni khan a rawn haw a, CMO conference hall-ah thuthar thehdarhtute a kâwm nghal a ni.

Chief Minister chuan, Home minister Amit Shah a kawmnaah, thil dangte chu video conferencing kaltlangte'n hawn ni ṭhin mah se, Zokhawsanga Assam Rifles headquarters chu Prime Minister emaw, Home Minister emaw ngeiin a hmunah hawng se a duh thu a hrilh tih a sawi a, "Home Minister hian a châk thu sawiin, 'Ka phur khawp mai' a ti a, a hun atan November kan ruat a, a ní tak erawh kan la tifel lo," a ti.

Vanglaini palai zawhna chhangin Zoram­thanga chuan, AR-te chu Zokhawsangah eng emaw zat an awm tawh thu a sawi a, "La lut kim lo erawh an awm. Union Home Minister berin a hawn tawh chuan lut nghal tura ngaih an ni. Home Minister-in a hawn tawh chuan an luah zui nghal kha chu loh theih loh turah kan ngai," a ti a; chutih rualin, thâwk leh khata luh nghal vut vut theih a nih loh tur thu a sawi bawk.

Zoramthanga chuan, Health minister Mansukh Mandaviya nen an inkawmnaah ZMC chu sorkar laipuiin enkawla a lak theihna tura Mizoram Health department-in rawtna a thlen a bawhzui thu a sawi a, "Health Minister hian a hlawhtlin ngei theihna atan theihtawpa hmalak a tum thu min hrilh. Central kuta ZMC hlan chungchang hi medical team-in uluk takin an zir chiang a ni," a ti.

Vanglaini zawhna chhangin CM Zorama chuan, sorkar laipui hnena ZMC hlan tum a nih chhan chu sum leh pai chungchang bakah, medical college ṭha an duh vang a nih thu a sawi a, "Keimahni'n kan enkawl chuan mithiam duh angin mithiam tak tak kan la lut thei lo a, specialist ṭha lak luh a harsa. Central hnuaia thawh chu nasa takin an châk ang a, a quality-ah pawh hma kan sawn ang," a ti. Sorkar laipuiin ZMC a la a nih pawhin, seat awm zinga a zatve (50%) chu Mizoram tan hauh a nih thu a sawi.

Chief Minister sawi danin, Union Health Minister hian Zemabawk Cancer Hospital-a hman tur khawl leina atan Mizoam Health department-in cheng vbc. 10 an dil chu pek a tum a ni.

Finance minister Nirmala Sitharaman-i'n Mizoram tana theihtawp a chhuah thu chhuang taka a lo hrilh thu sawiin Zoramthanga chuan, "Lawmthu hrilhin, nakin zela min ṭanpui a ngaih tur thu ka sawi. SASCI hnuaia cheng vbc. 400 min pek ang financial year thara min pek dawn leh dawn lohte ka zawt a, SASCI chu 2023-24 ah pawh ruahman a nih leh ngei a rin thu min hrilh," a ti.

Vanglaini palai zawhna Chief Minister-in a chhan danin, tun ṭuma sorkar laipui hotute a dàwrnaah hian thil nawr eng emaw zat a nei , sum pek (sanction) erawh a awm lo.

Chief Minister hi deputy chief minister Tawnluia, IPR minister Lalruatkima leh secretary to CM K Lalthawmmawia te'n an ṭawiawm a ni.

CHIEF MINISTER THUSAWI DANGTE
1) Union HRD Minister ka hmuhnaah Lungleia MZU Southern Campus din tum mek chu Mizoram sorkarin sum leh pai tum lo a, sorkar laipuiin an tum theihna turin ka sawipui. Ani pawhin àwm a tih thu leh a hlawhtlin nan theihtawpa hmalak a tum thu a sawi.
2) ADB hotu Country Director ka kawmnaah Mizoramin health care scheme atana cheng vbc. 1,000 kan dil, India sorkarin phalna a pek tawh process mek chu a chak thei ang bera hma lo lakpui a tum thu min hrilh.
3) MNF returnee-te in sakna tur ṭanpuina Prime Minister leh minister pawimawh dangte ka dil a, kan lehkha thehluh tawh process mekte a theih anga lo ûm zui an tum thu min lo hrilh.
4) Assam CM nen kan inbiaknaah, inremna siam ngei tura inbiakna neih zui zel ni se la, a ṭul angin CM-te pawh inhmuh zel ni se kan ti.
5) Assam CM nen dan loa hmarchhaka kuhva ro lo lutte dan chhunzawm zel a, ram mipui thar chhuah kuhva hralh leh phurh velah harsatna awm lo turin state pahnihte'n chak taka hmalak zui ni se kan ti.