Kolasib-a court building sak turah PWD leh contractor thu a inmil lo ; Lungphùm phùmnaah Abub Mazumdar a tel

Kolasib-a Fast Track Court building sak tur lungphùm chu September 24, Inrinni khan Gauhati High Court judge Justice Michael Zothankhuma'n a phúm. Lungphùm phùmnaah hian Assam sorkarin man a tum ṭhin Abub Mazumdar pawh a tel. In sak turah hian PWD-in sakna tur senso zat tura technical report-a an tarlan leh contractor leh PWD-te'n agreement an ziahnaa senso tur tarlan zat a inmil lo.

Justice Michael Zothankhuma chuan, judicial quarters sak mek a nih bakah Fast Track Court building sak a ni dawn ta chu lawmawm a tih thu a sawi a, "Thubuai chinfel hna thawhnaah Kolasib district mipui tana hmun ṭangkai tak a nih ngei ka beisei. Building rintlak, a nihna tur ang taka sak a nih ngei ka beisei bawk," a ti.

Kolasib bialtu MLA K Lalrin­liana, minister of state pawhin thu sawiin, Fast Track Court sakna tur hmun phal taka ruahmanpuitu Project Veng khawtlangte fakawm a tih thu a sawi.

PWD technical report-a a lan danin, Fast Track Court building hi cheng vbc. 17.99 sénga sak tur a ni a; chutih laiin, thuthar thehdarhtute'n contractor R Lalhnuna, Republic Veng, Aizawl an zawhfiahnaah, PWD nen cheng vbc. 13.75 sênga sak turin agreement an ziah thu a sawi thung.

PWD technical report-ah chuan court room leh lift awm tur a nih laiin, PWD leh contractor agreement-ah chuan court room pahnih awm tur a ni a, lift telh a ni lo. Hemi chungchang hi Kolasib-a thuthar thehdarhtute'n Justice Michael Zothankhuma an hrilh a, ani chuan PWD hotute a zawhfiah hnuah chanchin a hrilh tur thuin a chháng.

Lungphùm phùmnaah hian kumin kumtir lama Assam sorkarin kuhva ro tawlh ruk kaihhnawiha man an tum Abub Mazumdar pawh a tel. Kolasib District Court thuneitute chuan Abub Mazumdar chu an sàwm a nih loh thu an sawi. Kolasib aṭanga thudawn danin, Abub Mazumdar hian Kolasib bialtu MLA K Lalrinliana, minister inah tukṭhuan a ei a ni.

Tarlan tawh ṭhin angin, Assam media-te chuan Abub Majumdar chu dan loa kuhva tawlh rûknaa an hotupa a nih avangin Assam police-te'n an zawn mek thu kumin kum tir lam khan an tarlang.

Abub Majumdar hi Delhi-a Assam House-a Assam chief minister Himanta Biswa Sarma leh Mizoram chief minister Zoram­thangate'n zanriah an kîl dun ṭum pawhin a tel. Mizoram Chief Minister's Office leh MNF party ten CM Zoramthanga sàwm a ni lo angin an tarlang a; BJP, Mizoram chuan Mizoram lam sàwm ngei a nih thu an tarlang thung.

Abub Majumdar hi December 2018-a chief minister Zoramthanga hruai sorkar lâk luhnaah pawh a lo tel tawh a ni.

*)  PWD technical report-ah in sakna senso tur cheng vbc. 17.99 a ni a, contractor-in cheng vbc. 13.75 turin agree­ment an ziah thu a sawi thung.
*) Court room panga awm tura PWD-in an tarlan laiin, contractor chuan court room pahnih a awm dawn tih a sawi.
*) Thil inmil lo chungchang hi Gauhati High Court judge Justice Michael Zothankuma'n PWD a zawtfiah dawn.
*) Lungphûm phûmnaah Abub Majumdar a tel a, Kolasib bialtu MLA K Lalrinliana inah tukṭhuan a ei nia sawi a ni.