KHAWTHLIR

Kawng thar hawng
Minister of state Lalruatkima chuan September 24, Inrinni khan a bial chhung Vaivakawn thlànmual kaltlanga Zohnuai aṭanga NH-54 kawngpui pawhtu kawng siam thar a hawng. Lalruatkima chuan, kawng siam a puitlin theihna tura ram neitute'n an ram an pe chu lawmawm a tih thu a sawi. Kawng hi cheng nuai 166.77 sénga siam a ni.

Zu zuar 326 man
Mizoram Police leh Excise & Narcotics department chuan kumin August thla chhung khan MLP Act, 2019 hnuaiah zu zuar mi 326 leh zu rûi mi 46 an man. Rakzu litre 7,656.86, zu bilh lai ṭín 6,932, dawidim kg. khat, sapzu úm 1,735, beer búr 5,881, fruit wine litre 105.75, BEDC litre 87.3, zu sakna bél 24 leh lirthei 11 an man bawk.

Tuiah tla hlum
September 24, Inrinni chawhnu khan Tuivawl, Saichal kài bulah Mosa Lalremtluanga (22), ITI Veng, Aizawl chu a tla a, he thu ziah lai hian zawn mek a ni. Thu dawn danin, Mosa Lalremtluanga leh a ṭhiante pahnih, Keifanga mite chu chakai meichher chhit turin Tuivawlah an kal a, an pathumin tuilianin a la a, mi dang pahnih chu an inhamtàn theih laiin, Mosa Lalremtluanga chu tuilianin a lèn zui a ni.

Licence nei loa silai siam khap
Champhai district magistrate James Lalrinchhana chuan thupek chhuahin, Champhai district-a silai siamtu (gunsmith)-te chu licence nei loa silai siam/khawih ṭhat hna thawk lo turin a hriattir a; tualchher silai siam chu dan phal loh a nih thu a tarlang. Kângmei lakah mipui vantlang him nan kâng ṭhelhna atana hman theih tur húng/kawl reng turin a hriattir bawk.

Râltlânte tlawh
Home secretary H Lalengmawia chuan September 23, 2022 khan Champhai leh Zokhawthar a tlawh a, sorkar hotute a kawm bakah, Myanmar ráltlante harsatna tawhte a enfiah. Home Secretary chuan, Lipuichhuah leh Ṭiau lui kama ráltlante awmna hmunah kawlphetha pek dan ngaihtuah turin department hotute a hriattir. Zokhawtharah hian ráltlân chhungkua 1,000 chuang an awm mek a ni.