Union Minister-in Handloom Expo a tlawh

Zan hnih riaka Mizoram rawn tlawhtu sorkar laipuia minister of state Dr Munjpara Mahendrabhai chuan September 24, Inrinni khan Venghnuai, Aizawla Health & Wellness Centre leh Aijal Club Park-a State Handloom Expo a tlawh.

Ministry of Women & Child Development leh AYUSH enkawltu minister of state Dr Munjpara chuan, India sorkarin mipuiin hriselna ṭha zawk an neih theih nan kawng hrang hrangin hma a la tih sawiin, "Damlo rethei tê tête hi an dinhmun hriatthiam a, dimdawi taka enkawl an ngai zual. Inentir turte leh enkawl ngaite tan damdawi-in leh a chhehvel hi fai leh thianghlim taka enkawl a pawimawh," a ti a; Venghnuai Health & Wellness Centre enkawltute chu neitu thinlung pu turin a chah.

Dr Munjpara Mahendrabhai hian State Handloom Expo a tlawh a, Commerce & Industries minister Dr R Lalthangliana nen an inkâwm.
Dr R Lalthangliana chuan, Mizoramah ramhmul damdawi siamna tur tam tak a awma hriat a nih thu sawiin, "Mizoram tan ramhmul damdawi siamna tura hmalak leh kut hnathawktute zinga ramhmul damdawi chìn leh lak khawm dan inzirtirna nasa zawk neih a nih chuan state tan hmasawnna siam belh a nih ang," a ti a; Mizorama ramhmul thlaite zir chian a nih theih nan hma la turin Dr Munjpara a ngen.

R Lalthangliana chuan, Ministry of AYUSH-in Mizoram State Annual Action Plan 2022-23 a pawm tawh chu chak taka hmalak a nih theih nan sum pe thuai tur leh, a bikin Thenzawl, Lunglei, Kolasib, Champhai, Serchhip, Mamit, Lawngtlai leh Siaha AYUSH Hospital-a thawkte hlawh tur a rang thei ang bera pe turin a ngen bawk.

Dr Munjpara Mahendrabhai chuan, Mizoram Health Minister thu thlente chu Delhi lama a haw veleh a bawhzui tur thu a hrilh niin sorkar thuchhuah chuan a tarlang.