CM Zorama'n Myanmar remna atan Bul ṭan turin Prime Minister a ngen

Chief minister Zoramthanga chuan, tun hnaia prime minister Narendra Modi a hmuh ṭumin Myanmar buaina chinfel a nih theihna turin pa chan chang a, a bul ṭantu ni tura a ngen thu a sawi.

CM Zoramthanga hian September 24, Inrinnia thuthar thehdarhtute a kawmnaah, Prime Minister leh mi pawimawh dangte a hmuhnaah Myanmar buaina chingfel turin sorkar laipui ṭanpuina a pawimawh ber thu leh chu chu tuna kawng awm chhun pakhat nia a hriat thu a sawipui tih a sawi a, "India sorkarin pa chan chang a, ṭanpui turin ka ngen," a ti.

Myanmar remna atana hmalak hi President Droupadi Murmu pawhin a ngaih pawimawhzia a lo hrilh tih sawiin Zoramthanga chuan, "President hian Prime Minister pawh sawipui ngei a tum thu min hrilh," a ti a; minister dangte pawhin Myanmar remna atana hmalak hi an ngaih pawimawh vek thu a sawi.

Chief Minister chuan, Manohar Parrikar Institute for Defence Studies and Analyses hotute nen peace mission chungchangah an inkawm thu sawiin, "An hriat ngai loh ka sawi tam bawk a ni ang, an hotupa chuan kum 42 a service chhunga a hriat ngai loh a tam thu a sawi chhuak a ni. In ko khawmin, remchangah rei zawk ngaihthlak an duh thu min hrilh," a ti bawk.