Kumin Krismas hi MNF hruai sorkar Krismas hnuhnung ber a ni thei - Lalsawta

Mizoram Pradesh Congress Committee (MPCC) president Lalsawta chuan, kumin 2022-a Krismas lo thleng tur chu MNF party kaihhruai sorkarin Krismas a hman hnuhnun ber a ni thei tih a sawi a, chutiang a nih theih nan chuan ṭan la turin mipui a sáwm.

Congress president Lalsawta hian September 23, 2022-a Congress Bhavan-a inkhawmah thu sawiin, "Thla 2/3 lekah Krismas kan thleng dawn a, hei hi he sorkar, Zoram mipuiin ṭha lo an tih em em, mipui aia mahni inngaihsak, mahni dinchhuah tumte Krismas hnuhnung ber ni turin keini hian kan siam thei. MNF sorkar hnuaiah hian vawi khat chiah Krismas kan la hmang dawn a, chuvangin, theihtawpin i ṭang tlang ang u," a ti.

Lalsawta chuan, tunlaia lirthei khû endik dan kalphung sawiselin, Mizoram sorkar chu remhre lo luiah a puh a, "An rawngbawlsak, chhiah petu te, an hlawh, an chhiah aṭanga an pekte hianin an rawngbawlsakate hi an ngaihtuah lo hlein ka hria a, sorkar hian remruatna dang a siam thei a ni. Heng angte hi chu petrol pump-ahte pawh a test-na khawl, man to lutuk lem lo ang chu a bun fer fur thei a, tunah chuan hmun 3/4 velah an bun a ni àwm e," a ti a; Mizoram hmun 500 velah bun se mipui an buai vak loh tur thu a sawi.

Congress President chuan, "Pathian zara kan sorkar theih chuan ‘ease of doing business’ kan tih, mipui rawng kan bàwlnaa a awlsam thei ang ber, a remchang thei ang ber, mi dang tikhawlhkham lo leh mi dang tana harsa leh nghah rei ngaite emaw, heng ang chi zawng zawng hi tiboin, awlsam, nuam, dik leh ṭhain tih kan tum dawn a ni," a ti.