Green clearance tifel hma turin ngen

September 23-24, 2022 chhunga Gujarat-a National Conference of Ministers of Environment, Forest & Climate Change-ah Mizoram EFCC minister TJ Lalnuntluanga a tel a; Mizorama ecology leh economy ṭhan dan ngaihtuah chunga uluk taka enpui tur leh, green clearance buaipui chhung a rei loh nan tifel hma turin a ngen.

TJ Lalnuntluanga chuan, "Bawlhhlawh sâwngbàwl danah sorkar laipui nena thawhho a ṭul. Mizoramah pawh buaipui a ni a, department dang buaipui mah ni se, a endik leh phalnate chu pollution ang emaw, EFCC hming emawa pek a ngaih ṭhin avangin plastic chhia sawngbawlnate endikna kawngah hmanrua leh thawktu tih tam a ngai," a ti.

EFCC Minister chuan, Ramsar site atana Pala Wetland (Palak Dil) puan a ni chu lawmawm a tih thu a sawi rualin, Ṭamdil Wetland chu Ramsar site atan puan a nih theihna dilna a thlen a ni.

Mizoram chu ramri depa awm a nih avangin nungcha tawlh rûk leh dan loa sumdawnna a tam thu sawiin TJ Lalnuntluanga chuan, "Sahuanin dan neuh neuh a neih avangin nungcha tawlh rûk mante dah luh mai a remchang lo a, rescue centre tur sorkar laipui puihnaa din kan mamawh," a ti.

Minister TJ Lalnuntluanga hi principal chief conservator of forest RK Singh leh Mizoram Pollution Control Board chairman Rosiama Vanchhawng ten an ṭawiawm a ni.