Duhoma'n zirlai thar lawmna a hmanpui

Páng Zirlai Pawl, Aizawl chuan September 24, Inrinni khan Aizawl Central Hall, Venghluiah Fresher’s Social cum Meritorious Students’ Felicitation Programme an hmang a, ZPM leader Lalduhoma khuallian a ni.

ZPM Leader chuan, Páng hnamte chu Mizoram luahtu hmasa pawl zinga mi an nia a lan thu sawiin, "Kan pi leh pute hun laia an ṭawng hmanah te, an thu leh hla, tun hnua ṭawng upa kan tihahte hian Páng ṭawngte pawh a tel a, hei hian hmànlai chuan kan pi leh pute nen an khawsaho ṭhin tih a tichiang hle," a ti.

Zo hnahthlak hnam hrang hrangte chu inṭhendarh zawnga an awm chuan tih tham loah an chhuak dawn tih sawiin Duhoma chuan, "Kan vai hian unau vek kan ni a, mi dang nen khawsakhonaah inla hrang zawng ni loin, inpumkhat zawnga kan kal a ngai a, kan hnam hi ropui taka a din chhuah theih nan theihtawp kan chhuah a ṭul," a ti a; Páng hnam chu Bâwm leh Tlanglau te nen inhnai tak an nih avangin inen hrang lo turin a chah.

Lalduhoma chuan, Páng zirlaite chu theihtawpa zirnaa ṭan la tur leh eirûkna dopuiah a sáwm a, "Zirna hi ram leh hnam ṭhan len zelnaah a pawimawh em em. Zirnaah theihtawp chhuah u la, kawng hrang hranga hlawhtlinna in chan ngei theih nan duhsakna ka hlan che u. Eirukna hi kan ram leh hnam hmelma, min tichhetu a ni a, zirlai pungkhawm zawng zawngte eirûkna dopuiah ka sáwm che u a ni," a ti.

PZP Fresher’s Social cum Meritorious Students’ Felicitation Programme hi an vice president Hlimthangmawia'n a kaihruai a; PZP hnenah hian Lalduhoma'n Rs 20,000 a hlân a ni.