MNYF-in block tlawh chhuah khâr

Mizo National Youth Front chuan kum 2023 inthlanpuia inbuatsaihna atan Aizawla MNYF block hrang hrang tlawh chhuah hun an hmang a, September 23, 2022 khan Aizawl North Block MNYF nen AH&Vety Rest House, Selesihah a khârna hun hmangin, MNYF president Lalrinawma, MLA-in a hmanpui.

Lalrinawma chuan, MNF chuan hun harsa leh khirh vawi tam tak a paltlang tawh tih sawiin, "Harsatna hrang hrangin a tuai hriam tawh a nihna hi Pathian pawhin a hre reng a nih a rinawm a, ramin harsatna a tawh laiin mipui thlamuan turin koh chhuahin a awm ṭhin," a ti a; kum 2023-a MLA inthlanpui awm turah MNF party zài ngai tak chunga theihtawp chhuah turin a chah.

MNYF vice president Lalzahawma Khiangte pawhin thu sawiin, eptu party-te chu ngaihtuahna nei loa lalna leh thuneihna ringawt buaipuiah a puh a, "Insawiselna te, phunchiarna te, ṭawngkam mawi lo tak taka social media-a inṭawng khum te, thu hluite phawrh chhuaha Zoram mipuia inham puar an tum danahte hian politics role mawi tak hmuh tur a awm lo a, opposition party-ah beiseina thar neihna chhan tur a awm lo," a ti.

Inkhawmah hian Aizawl mayor Lalrinenga Sailo-in thu a sawi bawk.