Dengue laka invêng turin mipui chah

Directorate of Health Services (DHS) chuan thuchhuah siamin, Mizoramah dengue a hluar mek avangin inven kawngah ṭan lâk a ṭul thu leh dengue chu natna pung chak tak a nih thu an tarlang a, a theih ang anga inveng turin mipui an chah.

DHS chuan, dengue natna finfiah (exam) theihna khawl ELISA chu sentinel surveillance hospital (SSH) atana hman Civil Hospital, Aizawl leh Lungleiah a awm thu an tarlang a, "SSH pan remchang thei lote tan district hospital, PHC/CHC/SDH/UPHC tinah thisen sample lain, SSH-a exam turin an thawn thei a ni," an ti.

DENGUE - HRIAT TUR PAWIMAWH
# Dengue hi virus-in a thlen a, thosi Aedes aegypti (a dum leh a var ṭial rik rek) seh aṭangin inkai chhàwn theih a ni.
# Dengue chi hnih - dengue fever leh dengue haemorrhagic fever a awm.
# Aedes thosite'n vawi khat dengue hrik a pâi tawh chuan a dam chhungin a pai reng.
# Sikserh thlentu thosite ang lo takin Aedes thosite'n chhûn khaw ên laiin mi an seh deuh ber.
# Aedes thosite'n an tui (egg)-ah dengue natna an thlah chhâwng thei.
# Thosi tui (egg)-te chu tui tel loin rei tak a dam thei.
# Thosi inthlah pung zel tur vên nan in leh a vela tui tlin theihna tih bo tur.

DENGUE LAN CHHUAH DAN
# Aedes thosiin mihring a seh aṭanga ni 5-6 chhungin natna a lang chhuak ṭhin.
# Khawsik sáng, lu leh chal báwr ná, mitmu ná leh khaw ênga mit men harsa, ruh leh tihrâwl ná, taksaa bawl/vual sen awm.
# Dengue haemorrhagic fever lan chhuah dan - hnár, ká leh ha-hní aṭanga thi chhuak, luak, pum na tak leh nâk dinglam ná.
# Dengue fever - enkawlna bik damdawi a awm lo a, natna lan chhuah dan ang zela enkawl ṭhin a ni.