Hripui vei mek 178 (0.08%) chiah an awm

Mizoramah Covid-19 vei September 23, Zirtawpni khan mi 28 leh September 24, Inrinni khan mi 41 hmuh chhuah a ni a, Inrinni leh nimin khan hripui vei dam tawh mi 76 chhuahtir an ni. Covid-19 vanga thi an awm belh lo a; hripui vei mek mi 178 (0.08%) chiah an awm.

September 23-a hripui vei hmuh chhuah mi 28-te chu mipa 12 leh hmeichhia 16 niin, rapid antigen test hmanga hmuh chhuah vek an ni a; swab sample 354 endik aṭanga positive zat chu 7.91% a ni.

Inrinnia Covid-19 vei hmuh thar mi 41-te chu mipa 19 leh hmeichhia 22 an ni a, TrueNAT hmanga hmuh pakhat leh RAT hmanga hmuh 40 an ni. Swab sample 282 endik aṭanga positive zat chu 14.54% a tling.

Hripui vei dam tawh Inrinni khan mi 38 chhuahtir an ni a, nimin khan mi 38 tho chhuahtir an ni bawk.

IDSP record angin, Mizoramah Covid-19 vei 2,38,295 hmuh chhuah a ni tawh a, mipa 1,11,001 leh hmeichhia 1,27,294 an ni a, mipa aiin hmeichhia 16,293-in an tam zawk. Nimin tlai dar 5 thleng khan mi 2,37,394 (99.62%) chhuahtir an ni tawh a, mi 723 (0.30%) thi tawhin, enkawl mek mi 178 (0.08%) an awm.

Siaha district-ah Covid-19 vei enkawl lai an awm tawh lo a, district dang pangaah pawh 10 aia tlem vek an awm tawh. Active case 10 aia tam awmna district panga a awm a, a tamna ber Aizawl district-ah mi 72 an awm a ni.