Lirtheia dan loa thil târ mi 54 man tawh

State Transport Authority (STA) chuan kum 2012 hnuah Mizoram Motor Vehicle Rules, 1995 kalha sumdawnna lirtheia thil ziak/tár mi 54 an man tawh.

RTI Act hmanga zawhna chhan­naah STA SPIO chuan, tunlaia Aizawl city bus, taxi leh maxicab vela private company leh sorkar agency/society-te advertisement tàrte chu STA-in dan ang taka phalna a pek anga tar vek a nih thu a tarlang a, "Mahni thua eng eng emaw lo tar an awm chuan sorkarin a hriatpui lo a, dan anga hrem theih an ni," a ti.

Mizoram MV Rules 1995-a Rule 150(1)-ah chuan, STA phalna la hmasa loin sumdawnna lirthei­ah STA-in ziah tura a tih bak ziah phal a ni lo tih a chuang a, "No advertising device, figure, or writing shall be exhibited on any transport vehicle save as may be specified by the State Transport Authority by general or special order," tih a ni.

Mizoram MV Rules 1995-a Rule 150(1) hmang vek hian Transport department Director chuan July 14, 2017 khan district tina DTO-te hnenah lehkha a thawn a; DTO-te chu an district ṭheuhah STA phalna la lo leh Mizoram MV Rules kalha maxicab-a thu tarte chungah action la turin a hriattir a ni.

Transport Director lehkhaah chuan hetiang hian a inziak a: "...tunlai hian public service ve­hicle, a bik takin maxicab service ten STA aṭanga remtihna awm loin an motor-ah thuziak leh chhinchhiahna chi hrang hrang an belin an tár hmuh tur a tam hle a. Hei hi Mizoram MV Rules, 1995, rule 150(1)-in a phal loh thil a ni a. Hetianga MMV Rules-in a phal loh thil a lo hluar ta viau mai hi enforcement staff-te leh inspecting authority (MVI)-te inthlahdah vang niin a lang.

"Hei hi Department chuan a ngai pawimawh hle a. Chuvangin, District Transport Officer zawng zawngte'n mahni huam chhungah ṭheuh ṭhahnemngai taka MMV Rules 150(1) enforce chungchanga hma lo la thar turin leh MMV Rules bawhchhiate chungah MV Act-in a phût anga action la ngei turin kan inhriattir a. Hmalakna report hi July thla chhung ngeiin submit ṭheuh turin kan inhriattir bawk a ni," tiin.

RTI Act hmanga zawhna chhan­naa a lan danin, dan anga commer­cial vehicle-a thil tàr phalna STA-in a pek tawhte chu - CARE World Vision India, Mizoram State AIDS Control Society (MSACS), Mizoram State Tobacco Control Society (MSTCS), Sape Events & Media Pvt.Ltd. leh Childline te a ni.

CARE World Vision hnenah hian World AIDS Day 2015 puala HIV/AIDS awareness atan flag leh poster târ phalna November 24, 2015-ah pek a ni a; MSACS leh MSTCS-in awareness campaign-na thil târ phalna an dilna chu December 13, 2016-a STA mee­ting-in a phalsak a, MSACS hnenah December 21, 2016 phalna thu hriattir niin, MSTCS hnenah Feb­ruary 3, 2017 hriattir a ni thung.

8th. Education Fair 2017 adver­tisement city bus-ahte târ phal­sak a nih thu Sape Events & Media organiser Zothansangi Sailo hnenah April 13, 2017 hriattir a ni a; Transport department bus hrang hrangah Childline poster tàr phalsak a nih thu Childline coordinator Lallawmzuali hnenah October 30, 2015-ah hriattir a ni bawk.

STA-in commercial vehicle-a advertisement tar phalna a pek an tarlan leh phalsak an nih hriattirna photo copy RTI Act hmanga zawhna chhannaa thil tel zingah hian Aizawl city bus hrang hranga hun eng emaw ti chhung private company, KEI tih târ ṭhin chu a tel lo. KEI advertisement hi city bus-ah hun eng emaw chen tàr a nih hnuah, tunah chuan tàr a ni tawh loa thu dawn a ni.

STA-in phalna a pek angin, tunlai hian city bus, maxicab leh taxi-ahte vaihlo ṭhat lohzia inzir­tirna leh HIV/AIDS laka him­na tur inkawhhmuhte sticker hrang hrang tàr mek a ni thung.

STA chuan, STA-in commercial vehicle-a ziah tura phalsak chin bak ziaha tar mi 54 man a nih tawh thu a tarlang a; chutih rualin, "Commercial vehicle-ah hian STA-in ziah tura a phalsak ni lem lo ziak leh tar tam tak an awm a. hengte hi dan ang chuan hrem theih ni bawk mah se, Pathian thu (word) 2/1 lo ziakte chu Kristian kan nihna angin ngaihhnathiam chin a awm ṭhin," a ti.

Sorkar/ STA thuchhuah pawisa loa uchuak taka ziakte chu hrem an nih ṭhin thu STA chuan a tarlang a; MMV Rules, 1995, rule 150(1) chu a ṭul angin sorkarin khauh taka kehkawh zel a tum thu a tarlang bawk.