MNF chanchinbu enkawtute lakah Zodintluanga'n complaint a thehlut

MNF party chan­chinbu Hruaitu Arsi, September 1, 2017-a chhuakah, 'Lal­than­hawla'n CBI a hlau' tih thupui hmanga thu an chhuahah amah tihhmingchhiatnaa a awmah ngaiin minister Zodintluanga chuan nimin khan Hruaitu Arsi editor Lalthanzuala Hnamte leh publisher MC Lalrinthanga, Khatla South-te lakah criminal complaint a thehlut. Complaint hi first class magistrate T Lalhmachhuana hnenah thehluh a ni.

Zodintluanga hian ukil atan R Lalṭanpuia a ruai a, criminal complaint an thehluhah hian amah tihmingchhetua puhte hi IPC Section 499 leh 500 anga enfiahsak a, hremna pe turin a phût a ni. Criminal complaint thehluh hi nimin vek khan pawm a ni.

Hruaitu Arsi-a thu in­ziak Zodintluanga'n amah tih hmingchhiatnaa a ngaih chu, 'Pu Lalthanhawla'n Lottery-a mipui sum cheng vaibelchhe sing chuang a chhehrelh leh Pu Zodintluanga'n Mizo Carbon-a dik lo taka a nupui laizawn hminga cheng tam tak a lak ṭhin chu CAG report aṭang leh CYMA hmalakna aṭangin Mizoram mipuiin kan lo hre ta kha a ni," tih a ni.

Zodintluanga'n criminal complaint-a a ziah dan chuan, Hruaitu Arsi-a thu chhuah aṭanga a lan dan chuan, Zodintluanga hi Mizo Carbon aṭangin a nupui laizawn hmingin pawisa a la ṭhin tih a ni. He inpuhna hi dâwt, thu dik lo leh phuahchawp a ni a, a dam chhungin Mizo Carbon aṭangin pawisa pakhatmah a la dawng ngai loh thu a tarlang.

Zodintluanga chuan, vantlang hriat a nih avangin Hruaitu Arsi enkawltute chuan dâwt hmanga a nunphung leh eizawnna tihbuai tumah Hruaitu Arsi enkawltute hi a puh.