Mipui tibeidawngtu MNF leh Congress - Lalduhoma

ZNP president Lalduhoma chuan, MNF leh Congress party-te chu mipuite beidawnga siamtuah a puh a, "Sorkar ṭha beisei ngam tawh lo, mi dang pawh lo ni leh se la engmah ni lo tur hial khawpa min ngaihtir khawpa min tibeidawngtute hi hnâwl ngam a ngai tawh a ni,” a ti.

Nimina ZNP pisaa inkhawmah thu sawiin Lalduhoma chuan, "Tunlaiah mi kan beidawng hle mai. 'Anni pawh hi sorkar se engmah an ang chuang lo ang, tu pawh hi sorkar se engmah an ang bik chuang lo ang' tih hi ṭawngkam tualléng a ni," a ti a; chutianga mipuite beidawnga siamtu chu kum 33 chhung Mizorama roreltu Congress leh MNF party-te an niin a sawi.

Kum 2018 inthlanpui awm turah MNF leh Congress ni lo sorkarna siam thei turin Zoram Peoples Movement (ZPM) a ding tih sawiin Duhoma chuan, "Mipui kan tibeidawng ve dawn lo. Mipui la bum ve lo kan awm a, hma kan la mek a, kan la chho zel dawn. Chaw tui tak chhawpin kan awm tawh a ni tih hi Zoram mipuiin min hriatsak se," a ti.

ZNP President chuan, Congress party-in Pathianni khan zaithiam ṭhenkhat hnenah Rs. 14,000 an sem nia sawiin, “Mizote'na kan talent neih ṭhat deuh chu zai hi a ni a... Kan sorkar hian a tih tur chu Pathianin kan hnam talent min pek, zaithiamna te, zai ngainatnate hi tihmasawn a, eizawn nana hmang thei tura kan zai mite scheme siamsak a, an mamawhte ngaihtuahsak a, khawvela zaithiam ropui tak takte dinhmun ang pawh rap ve thei tura dâwmkan hi a ni," a ti. Congress party chu zai mite an zavaia ṭanpui si lo a, vote zawn nan leh lamṭang siam nana hmangah a puh a ni.