Sorkar leh HPC-D-te an inbe dawn hnai

Mizoram sorkar leh Hmar People's Convention-Democrat (HPC-D), Lalsangbera kaihhruai hotute chu remna kawng zawngin September 21-22, Ningani leh Zirtawpni hian Aizawlah an inbe leh dawn.

Thu dawn danin, Mizoram sorkar leh HPC-D inbiakna chhunzawm turah hian sorkar aiawhte chu Home department-a additional secretary Lalbiakzama'n a ho dawn a; Rural Development director Lalhriatpuia, CID (SB) SP Rodingliana Chawngthu, Home deputy secretary Lalthanzuala leh OSD David H Lalthangliana te an tel ang.

HPC-D lam chu working chairman Lalthangliana Hmar-in a ho dawn a; Lalṭhalien leh inbiakna hmasaa tel mi dangte an tel dawn a ni.

Mizoram sorkar leh HPC (D) te hi ṭum engemawzat an inbe tawh a, inremna tur thuthlung turte pawh an duang deuh tawh a, harsatna dang a thleng thut a nih loh chuan an inrem theih ngei beisei nia thudawn a ni.

HPC-D pakhat zawk, Lalhmingthanga Sanate kaihhruai pawh sorkar nena inremna kawng zawnga inbiakna neihpui tum a ni a, mahse, Lalhmingthanga Sanate pawlte hian Mizoram sorkar, HPC-D leh sorkar laipui nena inbiak an duh avang leh, tun hma lam aṭanga an thil phût Mizoram sorkarin a pek theih loh, autonomous district council pek an phût thu chhawp chhuah an duh avangin sorkar chuan inbiak tumna hi a ṭhulhsan nia thu dawn a ni.