HIV/AIDS tam chhanah Congress puh

MNF ṭhalai chuan thuchhuah siamin, mihring awm zat aṭanga chhûtin India rama state zingah Mizoramah HIV/AIDS vei an tam ber chu kum 9 chhunga Congress sorkar thawh raha an ngaih thu an tarlang.

MNYF chuan, Congress sor­karin kum 2015 aṭanga zu zawrh a phal chinah Mizoramah zu kaihhnawih sualna chi hrang hrang a pung niin an sawi a, "Ruih­hlo hman sual vanga thi an pung a, mipat hmeichhiatna hman khawlohna a hluar avangin HIV/AIDS vei pawh an pung zel a ni. Hei hi sualna leh nun khawlohna thlen thei zu phalrai vangah kan ngai," an ti.

CYMA hnuaia Supply Reduction Service (SRS) report danin, zu zawrh hma kum thum chhungin ruihhlo vanga thi mi 119 an awm laiin, kum 2015-a zu zawrh aṭanga tun thlenga ruihhlo vanga thi chu mi 131 an tling tawh niin MNYF chuan an tarlang bawk a, "Hei hian zu zawrh vangin ruihhlo vanga thi an pung tih a tilang," an ti a; Congress sorkarin Mizo ṭhalaite suattu zu a phalrai reng chu fate ei tura túr phul anga an ngaih thu an sawi bawk.