NDA-ah kan tel lo, Zorama'n dawt sawi - MPC

MPC senior vice president Vanlalhlana chuan nimin khan an party pisaa inkhawmah thu sawiin, MNF president Zoramthanga’n tun hnaia thu a sawiah, MPC party chu BJP kaihhruai National Democratic Alliance (NDA)-a tel ve anga a sawi chu MPC-in an helh hle tih a sawi.

Vanlalhlana chuan, "Ram bung khat hruai­tu lu ber nih tumin thu belhchian dâwl lo hmanga MPC party-te min puh duh mai hian mipui laka hmai phih a tumna maiah kan ngai. BJP kaihhruai NDA zawmtu India rama political party 47 zingah MNF party chauh hi Mizorama political party zinga tel awm chhun an nihzia chiang takin Central NDA list 2017-ah tarlan an ni," a ti a; NDA-ah MPC an tel ve anga sawi tawh lo turin MNF President a chah.

Vanlalhlana chuan, MPC, ZNP leh ZEM-te'n thawhhona thuthlung duang­a Mizoramah sorkar thar siam ngei tuma hma an laknain rah duhawm tak a chhuah chho mek zel niin a sawi a, "Kan beisei leh rin phak bâkin Congress leh MNF party aṭang te, mipui mimir aṭangtein he thawhhona huang aṭanga sorkar thar siam ngei duhtu a ni tèlin an pung zel a, kan pung chho zel dawn," a ti.

MPC Sr. Vice President chuan, kum 2018 inthlanpuiah mipui beisei sorkar thar, mipuite sor­kar apiang ngei tura an beisei thu a sawi a, Mizoram mipui ṭawiawmna a ngen a ni.