V/C laka Pukpui NGO thil tih dan dem

All Mizoram Village Council Association (AMVCA) chuan thu­chhuah siamin, Lunglei district-a Pukpui Village Council, member panga awmna chu Pukpui NGO Joint Meeting-in September 20, 2017 ral hmaa báng turin an phût niin an tarlang a, mak an tih thu leh hriatthiam har an tih thu an sawi.

AMVCA tarlan danin, Pukpui V/C-ah hian Congress member pathum leh MNF member pahnih an awm a; V/C member-te chu India democracy leh consitution hmanga mipui thlan leh din an ni a, dan bawhchhiat an neih a, dan hmang veka engkim finfiah a nih chauhin ṭhiah leh bàntir theih an ni.

AMVCA chuan, Pûkpui khawtlang rorelna chhunga inhriatthiam lohna a thleng chu pawi an tih thu sawiin, "VCP leh V/C member-te'n dan bawhchhiat leh thil dik lo, khawtlang leh mipui chanvo khawih chingpenna a awm a nih chuan an chungah FIR thehluh emaw, DLAO, Lunglei hnena complaint thehluha chhui chian a, thil dik lo titu chunga action lak ngei hi AMVCA duh dan a ni. Dan hnuaia engkim chhui chian a nih hma chu Pukpui VCP K Darsiama leh V/C member dangte hi an bàn chhan tur kan hre lo. Dan leh hrai kawng zawh turin Pukpui NGO-te kan ngen a ni," an ti.