KHAWTHLIR
World Democracy Day-ah tel
September 15-17, 2017 chhung khan Indian Youth Parliament Forum bultumin Jaipur, Rajasthanah 'UN World Democracy Day' hman a ni a, Mizoram Governor Lt.Gen Nirbhay Sharma khuallian a nih bakah, MLA Dr Ngurdingliana a tel. Jaipur-a UN World Democracy Day hmannaah hian India rama university hrang hranga zirlai thlante an tel a; Dr Ngurdingliana chuan September 17 khan 'Civil society ṭha hlutna' tih thupui sawiin, ram hmasawnna leh khawtlang nun siam ṭhatna kawngah Mizoramah sorkar leh NGO hrang hrangte thawhho dan te, NGO leh kohhrante vanga inthlanna thianghlim leh felfai tak neih a nih ṭhin dânte a sawi a ni.
Zu zuar 56 man
Excise & Narcotics department chuan August 2017 chhung khan zu zuar 56 leh zu rûi 155 an man. Rakzu litre 1109.65, Myanmar zu litre 104, zu bilh lai ṭín 3,058, sap zu (ûm puitling) ûm 406, zu sakna bél 13 leh zu kaih-hnawihah lirthei pakhat an man bawk.
Faina hnatlang
Mizoram sorkar chuan thuchhuah siamin, Lunglei District Sanitation Task Force chuan an chairman Lalzarmawii, DC hoa ruahmanna an siam angin, Lunglei khaw chhunga village council 24-te'n an huam chhung ṭheuhah vantlang hnathlang an ko vek tawh tih a tarlang a, "Lunglei khawpui hmun hrang hrangah faina kawnga inzirtirna banner-te târ chhuah a ni a, a khát tâwkin kawng dungah vantlang bawlhhlawh báwm hùn a ni," a ti.
Zirlai hnatlang
Khawpui fai inelna kal zelah Mamit khawpuia Presbyterian English School (PES)-a zirlaite chuan nimin khan an sikul awmna veng, Venghlun huam chhunga kawngpuite an phiat fai. Fainaa inelnaah hian Mamit khawpui chuan kawng hrang hrangin hma a la a; sorkar, mimal leh zirna-inte chuan a inchhâwkin faina hnatlang an nei ṭhin a ni.