Firfiak tan Mizoramah bu khuarna tur Hmun remchang a awm lo - DGP

Mizoram director general of police (DGP) Thianghlima Pachuau chuan, Mizoramah Muslim firfiakte'n bu an khuar lohna turin theihtawp an chhuah thu a sawi a, "Bu khuarna tur hmun remchang Mizoramah a awm lo a, hei hi kan vanneihna a ni," a ti.

National media-te tarlan danin, September 17, 2017-a New Delhi-a man, Muslim firfiak pawl Al-Qaeda mi leh sa Shami Rehman chuan Myanmar-a Rohingya Muslim-te pui turin Mizoram leh Manipur-ah bu khuar an tum thu a sawi. Shami Rehman hian kum li chhung Al-Qaeda a zawm tawh a, a kut

aṭangin pistol leh cartridge pali man a ni.

Vanglaini palai zawhna chhangin DGP Thianghlima Pachuau chuan, national media-te thu ziah chungchang chu official-in an hriat loh thu a sawi a, "He thuthang a awm hma daih tawh hian Mizoramah firfiakte'n bu an khuar lohna atan theihtawp kan lo chhuah tawh a, SP, commandant-te leh inteligence lam pawh thil pawimawh leh tih turte hrilh vek an ni tawh," a ti.

Thianghlima Pachuau chuan, Mizoramah mi firfiakte tan bu khuar a harsat tur thu sawiin, "Mizoramah chuan Muslim-te chên khawmna hmun a awm lo a, hei vang hian helte tan chuan bu khuar a harsa khawp ang," a ti a; Mizoramah chuan tlawmngai pawlte an active avangin mi firfiak inbun tum tan thil tih a harsat tur thu a sawi.

Myanmar ram buaina vanga Rohingya Muslim raltlan turte Mizorama an lo luh lohna atan ṭha taka inpuahchah a nih thu sawiin DGP chuan, "Assam Rifles, BSF, Mizoram Police leh intelligence agency hrang hrang hotute nen pawh meeting kan nei tawh. Ramri uluk taka ven a ni a, Myanmar leh Bangladesh ramri pawh a vengtu Assam Rifles leh BSF hotute pawh an rawn kal a, an vil reng a ni," a ti.

Mizoram DGP sawi danin, Mizoram Police hnuaia inteleligence-te'n Aizawla Muslim hotute an be tawh a, Rohingya Muslim-te an lo luh leh luh lo thlithlai a, ṭanhopuiah an sáwm a ni.

Rohingya Muslim-te hi Mizoramah an rawn luh rinna awm lo mah se, fimkhur thilah Mamit leh Kolasib district vela huan leh leilet vela inhlawhte chu a ram neitute zawng chhuakin, an mi chhawr angte ngei an huan leh leiletah an awm em tih finfiah vek a ni dawn. Mizoram chhunga hnam dang inhlawhfate pawh zir chian vek a ni ang.

Myanmar-a Rohingya Muslim-te awmna hmun hi Mizoram aṭanga a hlat avangin Champhai district lam aṭanga Mizoram rawn lut tur chuan Kristian leh Buddhist-te awm khawmna an paltlang a ngai dawn a, chu vang chuan khawchhak lam aṭang chuan an rawn luh a rinawm loh a ni.Mizoram rawn luh an tum dawn a nih chuan, Tripura ramrîah Muslim awm khawmna a tam avangin Tripura lam aṭanga an rawn luh a rinawm zawka ngaih a ni.

Rohingya Muslim-te hi Mizoramah an rawn luh ring lo mah se, Mizoram Police-te an inrálring reng tih sawiin Thianghlima Pachuau chuan, "An lo lut dawn a nih chuan lo dang tura inring tur leh an lo lut tawh a nih pawha zawng chhuak turin theihtawp kan chhuah a ni," a ti.