Miretheite chan ái laksaktute lakah sorkarin thikthu a tichhia - CM Hawla

New Secretariat Complex-a Irrigation & Water Resources (IWR) department directorate thar chu nimin khan chief minister Lal Than­hawla'n a hawng. Chief Minister chuan, mirethei chan ai laksaktute lakah sorkarin thîkthu a tihchhiat thu a sawi.

CM Lal Thanhawla chuan, department hrang hranga officer-te zingah kut hnathawktu (beneficiary)-te aia huan nei ṭha zawk, thlai ṭiak siamna nursery nei ṭha zawk, sangha chi siamna nursery nei ṭha zawk, sangha dil nei ṭha zawk, buh hmun leh thlai hmun nei ṭha zawkte an awm thu sawiin, chu'ng mite chu an hmalaknaah hlawhtling an intih leh intih loh a zawt a, "Kut hnathawktute an la berh em em laia mahni lo inhmakhua hi thil tih chi a ni em tih hi an inbihchianna turah ngai se kan duh. Mirethei chan ái laksaktu chungah sorkar chu a thîktu a chhe hle a ni," a ti.

Act East Policy hmanga hmalaknain Mizo­ram chu 'Gateway for Trade and Commerce' atan a hmang dawn tih sawiin CM Hawla chuan, "He hmalakna lian tak hi Mizoramin a ṭangkai thei ang bera hman a tum a ngai. Mizoram mipui tam berin eizawnna atana an hman mek, agriculture & allied sector huang chhunga theihtawp chhuah chu mithiamte'n a hlâwk ber tura an ngai," a ti a; kut hnathawktute pawhin ṭhahnem an ngaih a ṭul dawn thu a sawi.

Mizoram state chu kum 30-a upa a nih tawh tih sawiin Lal Thanhawla chuan, "Mihring mihrinna aṭanga teh pawhin kum 30 chu puitlin hun tawh a ni a, heng hun chhunga kan department tam takte pawhin mahni puala office building thar an neih tak zelah chuan puitling zia an chhuah a, an hmunhma tharte'n an efficiency pawh a tihsan chhoh zel mipuite'n kan beisei a ni," a ti.

IWR department office building hi Decem­ber 10, 2010 khan LIC(P) sum hmanga sak ṭan a ni a, a sak zawkna atana senso zawng zawng chu cheng nuai 754.22 a ni.