ZPM hi Mizoram politics thlak danglamtu tur a ni - MPC President

MPC president Lalhmangaiha Sailo chuan, MPC, ZNP leh Zoram Exodus Movement (ZEM)-te'n thawhhona, Zoram Peoples’ Movement (ZPM) an din chu Mizoram politics thlak danglamtu tur a nih thu a sawi.

Nimina MPC pisaa inkhawmah thu sawiin Lalhmangaiha Sailo chuan, Mizoram mipuiin Congress leh MNF kaihhruai sorkar ni lo din hun an thlir mek niin a sawi a, "Kan ram politics-ah hun thar inkaihhruaina ṭha zawk awm zel turin beiseina thar a awm mek a ni... Kum 2018 inthlanah mipui beisei sorkar din turin ZPM-in theihtawp chhuahin hmalakna kan kalpui zel dawn a ni," tiin, mipui sorkar din a nih theih nan thawhpuiah mipui a sáwm.

MPC President chuan, Citizenship Amendment Bill chungchangah Assam leh Arunachal Pradesh-te'n ṭan an la nasa a, sorkar laipui an dawrna, engti kawng zawng pawha dodal turin hma an lak tur thu an hrilh niin a sawi a, "Hetianga paukhauh deuha ṭan la thei turin kum 30 chhung sorkarna chang tawh Congress leh MNF-te'n kan ram leh hnam min hum zo thei lo hi a beidawnthlak a, a vanduaithlak hle a ni," a ti.

Nimina party pisaa inkhawmah hian MPC zawm thar eng emaw zat chu Lalhmangaiha Sailo-in a lawm lut niin MPC thuchhuah chuan a tarlang.

MPC Executive Committee member-te nimina ṭhukhawm chuan resolution an siam bawk a; ZPM a piang chu lawmawm an tih thu tarlangin, "Thawkho kan nih ang ngeiin rinawmna, chakna, inpumkhatna vawng nung zel turin MPC party mite kan ngen a ni," an ti a, 2018 inthlanah ZPM thlang tling ngei turin mipui an ngen.

MPC resolution chuan, Mizoram hmun hrang hranga kawngpui chhia chu kum 30 chuang rorel tawh MNF leh Congress vanga an ngaih thu te, Citizenship Amendment Bill dodal kawnga NGO Coordination Committee hmalakna an thlàwp thu te, kum 2018 inthlanah Chakma MLA nei lo tura hmalak ṭha an tih thute a tarlang bawk.