Medal latute chawimawi

September 3-9, 2017 chhunga Commonwealth Weightlifting Champion­ship, Australia-a neiha India tana gold medal latu Jeremy Lalrinnunga leh silver medal latu Zakhuma te chu nimin khan Sports & Youth Ser­vices minister Zodin­tluanga'n a pisaah chawi­mawina a hlan.

Sports Minister chuan, international level-a Mizo ṭhalaite'n gold medal leh silver medal an dawng thei chu Mizoram tan hmingṭhatna a nih thu a sawi a, "Jeremy-a phei chuan a telna category-ah record a siam avangin Mizo ṭhalaite hian infiamna khawvelah an tum phawt chuan a ber nihna kan chang thei reng tih a tihchiang a ni," a ti.

Jeremy-a leh Zakhuma hlawhtlinna bulpui ber chu insûmtheihna, tum­ruhna leh chak ngei tumna vang a ni tih sawiin Zodintluanga chuan, "Ṭhalai dangte infiamna khawvela hlawhtling duhte tan entawn tlak an ni," a ti a; ṭhalaite'n mahni nun an uluk a, an invawn ṭhat ṭheuh a duh thu a sawi.

Chawimawina inkhawm hi SYS secretary HL Rochungnunga'n a kaihruai a; SYS department leh Mizoram State Sports Council-a thawktute bakah weight­lifting association hruai­tute an tel a ni.