MNYF-in Zo Carbon document an hâl

MNF ṭhalaite chuan Zo Carbon chu a rang thei ang bera CBI chhuitir an phût bakah, minister Zodintluanga bâng turin an phût a; nimin khan Zo Carbon document ṭhenkhat an hâl.

MNYF thuchhuah chuan, Zo Carbon chungchanga thil dik lote chu ei rukna lian tham a nih thu leh cheng nuai 1,000 chuang tling pha a nih thu a tarlang a, "Zo-Carbon CBI chhuitir tura June 9, 2017-a sorkarin a remtih tawh chu a rûkin July 31, 2017 khan Congress sorkarin a sût leh a (Ref No C.31.16/55/2016-VIG Dated. 31July, 2017). Hei hi Zo Carbon eiruknaa lal chhungkuate an fihlim loh vanga CBI chhuitir tak tak an ngam loh vangah kan ngai. A rang thei ang bera CBI chhuitir turin sorkar kan phût a ni," a ti.

MNYF chuan, Mizorama lungalhthei truck trip 2,000 chuang phur lût anga Taxation checkgate-a record a ni chunga a taka phurh luh hmuh tur awm si lo nia sawiin, subsidy cheng nuai tam tak pekna kawngah Taxation minister hlui Zodintluanga chu a mawhphurtua an ngaih thu an tarlang.

MNF ṭhalaite chuan, Zo Carbon chu CBI chhuitir phût nan leh minister Zodintluanga a bàn phût nan Zo Carbon factory-ah document dik lo an hmuh theihte an hâl ta tih an sawi a ni.