Lawngtlai District Jail enkawl dan duhthusam lo deuhah ngai

Lawngtlai District MJA-te chuan nimin khan an president ZD Dengngura hoin Lawng­tlai District Jail an tlawh a, jail enkawl dan chu duhthusam lo deuhah an ngai. Jail-ah hian mi 26 an tâng mek.

Lawngtlai MJA-te hi jail superintendent HC Lallianvuta hoin thawktute'n an lo dawngsawng a; district jail dinhmun tlangpuite an sawiho bakah, thawktute chenna hmunte an fang kual a ni.

Lawngtlai District Jail-ah hian thawktu mi 40 awm tura tih a nih laiin, hmun danga dah (attach) mi pakua an awm avangin thawktu 16 an awm mek. Thawktute chenna quarters 23 a awm a, chu'ng zinga 10 chu ruah a far nasat vangin luah hleih theih a ni lo.

Hmeichhe tànna tur bik a la awm lo a, hmei­chhe dahna tur building awm mah se, tàn-in atana cheibawl a la ngai a, anmahni enkawltu tur bik thawktu pawh an la awm lo. Jail tángte hriselna endik turin doctor an kal ngai lo bawk a ni.