Zo-vawk pawma tlangzarh a ni

Mizote’n hmanlai aṭanga vawk an lo vulh ṭhin, Zo-vawk chu India rama vawk chi khat (breed) atan Indian Council of Agricultural Research (ICAR), New Delhi hnuaia Breed Registration Committee chuan August 4, 2017-ah pawmin an tlangzarh. Mizoramah Zo-vawk 39,000 vel awm anga chhût a ni.

Breed Registration Committee of Indian Council of Agricultural Research-in Zo-vawk hi India rama vawk chi khat atana an pawm theih nan hian All India Coordinated Research Project on Pig (AICRP on Pig) leh Central Agricultural University (CAU)-a College of Veterinary Sciences & Animal Husbandry (CVSc & AH), Selesih-te chuan kum 2009 aṭangin hma an la tawh a ni.

Zo-vawk hi India rama vawk breed pawm a nih rual hian Assam bawng chi khat leh varak chi khat, Tamil Nadu leh Nagaland-a kel chi hnih, Arunalchal Pradesh-a yak chi khat, Odisha-a ar chi khat leh Jammu & Kashmir-a vatáwk chi khatte pawh pawm a ni.

CVSc & AH tarlan danin, National Bureau of Animal Genetic Resources, Karnal (NBAGR) hi India rama ran vulh hmuh chhuah thar (newly identified germplasm)-te ziah luhna hmun a ni a, breed hmuh chhuah tharte chu ICAR hnuaia Breed Registration Committee-in a pawmpui a ngai ṭhin.