Youth Summit neih ṭan a ni
Sustainable Mountain Development Summit (SMDS) VI hnuaia programme pakhat, 'Youth Summit' chu Thawhṭanni zan khan Youth Hostel, Luangmualah Planing secretary Dr. C. Vanlalramsanga'n a hawng.
Dr. Vanlalramsanga chuan ram leilung hausakna leh ram hmasawnna kan kalkawp tir thiam a ṭul thu sawiin, "Hemi kawngah hian thing leh mau ti chereu leh sik leh sa ti danglam theite chu enchian a ngaih. Ṭhalaite'n ram leilung venhim leh ngaihhlut kawngah kan ṭhang harh a, hmala tu ber kan nih a ngai a ni," a ti.
Sustainable Mountain Development Summit-a tel state ṭhalaite chu ram leilung pawh in ang tak tak leh sik leh sa inthlak chungchanga harsatna thuhmun tawkte an nih thu tarlangin inthurual leh inrawnkhawm chunga hma la turin Dr. C Vanlalramsanga chuan a fuih.
Youth Summit bik hi September 18-20 chhunga neih tur a ni a, Sustainable Mountain Development Summit (SMDS) VI hi September 20-22 chhunga neih tur a ni thung.
Summit-ah hian Himalayan bul ṭhut state aṭangin palai 62 an tel a, state hrang hrang hnam zia, thiamna leh finna te inzawmkhawm a, intichak tlang chunga hmalakna nei tura zirtirna neih a ni ang.