Aizawlah No Tobacco Rally buatsaih

Indian Society on Tobacco & Health (ISTH) Mizoram Chapter, Mizoram State Tobacco Control Society (MSTCS) leh TATA Trust hnuaia Center for Microfinance and Livelihoods-te buatsaihin nimin khan Aizawlah No Tobacco Rally neih a ni a, Health minister Lal Thanzara'n Millennium Centre kawt aṭangin a vai liam.

Health Minister chuan, No Tobacco Rally buatsaih a ni chu lawmawm a tih thu sawiin, "Mihringte'n tum kan nei ṭheuh a, kan tuma hlawhtling tur chuan mahni inthununna a pawimawh. Infiammi hlawhtling tak ni tur chuan zûk leh hmuam leh ruih theih thila fihlîm a pawimawh hmasak ber a ni. India rama zûk leh hmuam hluarna leh cancer natna vei tamna state kan ni hi a pawi hle," a ti.

ISTH Mizoram president Lal Riliani pawhin thu sawiin, "Vaihloah hian taksa tichhe thei chemical 7,000 chuang a awm a, hemi zinga 80 hi cancer thlen thei chi a ni," a ti a; ṭhalaite chu vaihlo, gutkha leh a kaihhnawihte laka fihlim vek turin a chah.

No Tobacco Rally-ah hian naupang, infiammi leh sport association member-te an tel a; Millennium Center ṭanga Vanapa Hall kawt thleng vaihhlo ṭhat lohna thuziak kengin kawng an zawh a ni.