KHAWTHLIR

Chawlh puan belh
Mizoram sorkar chuan kum 2018 chhunga sorkar chawlh (holiday) turte a puan tawha tel lo, Missionary Day (January 11), YMA Day (June 15) leh MHIP Day (July 6)-te chu holiday atan a puang leh. Hemi chungchanga hriattirna hi General Administration department secretary Zothankhuma chuan nimin khan a tichhuak a ni.

Heroes campaign
Mizoram State AIDS Control Society (MSACS) leh Association for Voluntary Blood Donation (AVBD) chuan nimin khan UPC (NEI) hmunpui, Mualpui, Aizawlah Aizawla PYD member-te pualin 'Heroes Campaign' an buatsaih. PYD member 60 chuang an tel a, resource person mi pangain HIV/AIDS leh thisen pek chungchanga hriat tur pawimawhte an sawi a ni.

Ruihhlo dan zirho
Excise & Narcotics department chuan nimin khan an commissionerate conference hall-ah 'Provisions of The Narcotics Drugs & Psychotropic Substances Act 1985' tih thupui zirhona hun an hmang a; additional public prosecutor pahnih - Lalremthangi leh C Lalremruati ten thupui an sawi a ni.

Thisen pe
Mamita MNF ṭhalaite chuan vawiina Martarte Ni pualin nimin khan Mamit District Hospital-ah thisen unit 29 an pe a, a petute hi mipa 23 leh hmeichhia paruk an ni. Mamit MNYF president H Rodingluaia chuan, martarte hriatreng nana a mamawh apiangte hman tura thisen pek chu an tihmâkmawha an ngaih thu a sawi.

In saksak
Durtlang Mistiri Association chuan an kum 25 tlin lawmna atan September 18, Thawhṭanni khan Special Blind School, Durtlang pisa tur hnatlangin an saksak a, mi 20 vel an thawk chhuak. Silver jubilee lawm nan hian Special Blind School sain September 16 khan an lo hnatlang tawh a; Synod Hospital-ah furniture eng emaw zat an pe tawh bawk.