KHAWTHLIR

Mizoram University Teachers' Association (MIZUTA)chuan vawiin hian MZU Park-ah 'Peaceful demonstration against JNU attack' an huaihawt dawn a, January 5, 2020-a misual rualin Jawaharlal Nehru University (JNU), New Delhi an beih duh lohna lantirin zirtirtu leh zirlaite an pung khawm dawn. He hunah hian pawl panga - MIZUTA, MUNTSA, MZU Students' Council, MZU Alumni leh JNU Alumni aiawhte'n thu an sawi ang.

Mizoram police-a CID (Special Branch) leh CID (Crime) chuan Mizoram police din champha pualin nimin khan blood donation camp an huaihawt a, Aizawl Civil Hospital tan mipa 37 leh hmei­chhia pakhatte'n thisen unit 38 an pe. Serchhip Chanmari Vengthar Branch KṬP pawhin nimin khan Serchhip District Hospital tan thisen unit 11 an pe a, a petute hmeichhia paruk leh mipa panga an ni.

MPC party ṭhalai chuan thuchhuah siamin, Zoramthanga kaihhruai Mizoram sorkarin zu zawrh chungchang an vawrh chhuak chu Citizenship Amendment Bill (CAB) boruak tihdahlauna hmanrua atana an tih nia an ngaih thu an

tarlang a, "CAA laka mipui rilru hruai kâwi an tumna mai a nihzia a tilang chiang hleah kan ngai a, ṭul miah loa mipui rilru tichî-âi zawng­a hmalakna sim tawh turin Pu Zoramthanga kan beisei," an ti.

Mizoram sorkar chuan Printing & Stationery controller David Liansanglura Pachuau chu joint chief electoral officer (Joint CEO) atan a ruat a; Printing & Stationery controller atan hian Angela Zothangpuii a ruat nghal. Officer pahnih sîksawina thupek hi nimin khan tihchhuah a ni.

Champhai Zotlang khaw hmun hluia Botanical Garden siamna tura ruahman chu nimin khan Environment Forest and Climate Change minister TJ Lalnuntluanga'n a enfiah. Botanical Garden hi Mizoram chhunga thing leh mau awmte humhalh a, awlsam taka hmuh mai theih tura phochhuahna hmun tur a ni a, mipui vantlang tana lenkhawthawnna leh zirna pui theitu tura ruahman a ni.