Mizoram sorkarin OMB hmangin Cheng vbc. 100 a pûk leh dawn

Mizoram sorkar chuan open market borrowing (OMB) hmangin loan cheng vbc. 100 a pûk leh dawn. Sorkar kum kal mek, 2022-23 chhungin Mizoram sorkar chuan OMB hmangin ṭum li loan a lo pûk tawh a ni.

Vanglaini thu dawn danin, Mizoram sorkarin OMB hmanga sum a pûkna tura tih tur ṭulte chu Reserve Bank of India (RBI)-in an buaipui mek. OMB hmanga sum pûk a nih theih nan RBI-in state sorkar tan sum pûk tur a zawng a, financial institution-te'n an chháng ṭhin.

OBM hmanga sum pûk chu kum khatah a pung vawi hnih rulh tur a ni a, kum 10 chhungin pawisa pûk zawng zawng rulh a ngai a; a punna chu 7-8% a ni. Sorkar kum kal mek chhung hian Mizoram sorkar chuan OMB hmangin cheng vbc. 540 a pûk tawh.

Financial year 2022-23 chhunga OMB hmanga RBI aṭanga sum pûk phalna Mizoram sorkarin a neih zat chu cheng vbc. 990 a ni a; tun dinhmunah cheng vbc. 540 pûk a ni tawh a, cheng vbc. 100 a pûk leh chuan, cheng vbc. 640 a pûk dawn ta a ni.

Hetih lai hian, Mizoram sorkar chuan sorkar kum kal mekah OMB tiamin, hmun hrang hrang pali aṭangin loan cheng vbc. 626.35 a pûk tawh. OMB hmanga a pûk leh tur nen kumin sorkar kumah cheng vbc. 726.35 a pûk dawn tihna a ni.

Mizoram sorkar chuan loan hi May thlaah ṭum li, June-ah ṭum thum, July-ah ṭum ruk leh August thlaah ni 28 thlengin ṭum thum a pûk tawh a; April thlaah a pûk lo thung. Ṭum khata a pûk tam ber ṭum, August 2, 2022 khan cheng vbc. 200 a pûk a ni.