All India/ Central service officer tharte Lungsenah an inzir mek

Lal Bahadur Shastri National Academy of Administration, Mussoo­rie-a IAS leh IRS officer, 2022 batch-a mi paruk chu Field Study and Research Programme - 97th Foundation Course neiin Lungsenah an chám mek. Nimin khan Lungsen North Branch YMA Hall-ah Lungsena VC member, YMA, MHIP leh MUP hruaitute leh sorkar department aiawhte nen an inkâwm.

Inkawmnaah hian Lungsen khawtlang dinhmun tlangpui leh nun dan te, pawl hrang hrangin khawtlang tana hma an lak dan leh hmachhawp an neihte an inhrilhfiah a, Lungsena sorkar department hmalaknate leh mipui vantlang khawsak dan tlangpui enin khaw chhung an fang bawk.

IAS leh IRS officer tharte hi September 29, 2022 thleng Lungsenah an awm dawn a, an chàm chhungin Lungsen leh a chhehvela Mizo leh hnam hrang hrangte nunphung leh khawsak dan te, mipui vantlang nun dan leh sorkar hmalaknate a hmunah tlawhin an zir dawn a ni.