Lung phûmnaa Assam-a thubuai nei Abub a tel chhan sawifiah kan phût - ZPM
ZPM hruaitute chuan nimin khan Kolasib Press Club-ah thuthar thehdarhtute an kâwm a; September 24, 2022-a Kolasib Fast Tract Court building sak tur lungphùm phùmnaa Assam sorkar hnuaia thubuai nei lai Abub Mazumdar tel chhan sawifiah turin chief minister Zoramthanga leh Abub-a'n tukṭhuàn a eina in neitu Kolasib bialtu MLA K Lalrinliana, minister of state an phût.
ZPM PAC member TBC Lalvenchhunga chuan, in sakna tur lungphùm phùmnaah Assam-a smuggling thubuai nei Abub Mazumdar a tel tih sawiin, "Hriatthiam harsa kan ti hle. Kan ram min kaihruai mektute'n kan ram an enkawlnaah hnam dang an duhsak dan, dan pawisa lo leh dan zâwm lote an vulh len dan thlirin, hnam party intite hian kan hnam hi an hralh mek em ni?" a ti.
TBC Lalvenchhunga chuan, state dangin case an awrhtir mek leh bail vanga chhuah lai khualṭha thlenin minister of state K Lalrinliana inah a thleng nia sawiin, "A lungchhiatthlak hle. In sakna tur lung phùmnaah Abub Mazumdar tel ve chhan chu Fast Tract Court lamah kan zawtfiah a, sàwm a nih loh thu min hrilh," a ti a; High Court lam sàwm zingah pawh a tel lo tih a chian thu a sawi.
Abub Mazumdar chu Assam sorkarin wanted tia a puan a nih thu sawiin TBC Lalvenchhunga chuan, "March 11, 2022 khan Dholai Police Station-ah a in surrender a ni. Anticipatory bail la mah se, a case dang pahnih avangin man zui a ni ta tho. Tunah hian bail-a chhuak a ni a, bail condition hi kan chhui zui a, Assam chhuahsan thei a ni em tih leh Mizoram rawn lut tura ILP hi tu nge sponsor tihte hriat kan duh," a ti.
ZPM PAC Member chuan, Assembly House-a zawhna minister-te'n an chhànna aṭangin Abub Mazumdar chu contractor a ni a, M/s Agro Fresh Training Corporation supplier a nih thu tarlan a ni tih sawiin, "Tunah hian Dholai PS-ah kuhva rah chungchangah thubuai nei mekin, Rangirkhari PS lamah pawh fertiliser hmanga dan loa sumdawnna kalpui vangin case a nei mek a ni," a ti a, Abub chu dan pawisa lo a nih thu a sawi.
TBC Lalvenchhunga chuan, state dang pawhin an ngaimawh lai Abub-a chu Mizoramah a huangtau mai ni loin, September 26, 2021-a Assam leh Mizoram CM-te Delhi-a an inhmuhnaah official delegation zingah a tel tawh tih a sawi a, "Kan Chief Minister zanriah a kîlpui a, kum khat êm pawh a la liam leh hmain Supply minister Pu K Lalrinliana inah chawhlui a kîl leh a ni," a ti.
ZPM hruaitute chuan, Mizo unaute'n bill an hmuh theih loh laiin Hnam Rûnin list a tihchhuahah Abub Mazumdar leh Kamrul ten bill táng an nei ngai mang lo tih a lan thu sawiin, "Hnam party inti, ram humhalh tura kan beiseite'n hnam dang record nei ṭha em em lote duhsakna uchuak nena mahni in lumah chaw an la eipui thei a ni," an ti bawk.
TBC LALVENCHHUNGA THUSAWI
1) Dan pawisalo leh dan zâwm lote an vulh len dan thlirin hnam party intite ber hian kan hnam an hralh mek em ni?
2) Abub Majumdar-a, Mizoram rawn lut tura ILP hi tu nge sponsor tih hriat kan duh.
3) State dangin case an awrhtir mek leh bail vanga chhuah lai khualṭha thlenin minister of state K Lalrinliana inah a thleng.
4) Abub Mazumdar hian Dholai PS-ah kuhva rah leh Rangirkhari PS-ah fertilizer kaihhnawihah thubuai a nei a, bail-a chhuah mek a ni.
5) Kan CM-in zanriah a kîlpuina kum khat a liam hmain Supply Minister-inah chawhlui a kîl.