In sak ṭhat nan mau lian pui pui kan pu thleng thar dawn a ni zawk - Zoramthanga

Chief minister leh MNF president Zoram­thanga chuan, Asian Development Bank (ADB) aṭanga cheng vbc. 1,000 puk an tumah vbc. 720 chu sorkar laipui rulh tur a nih thu sawiin, "In sak ṭhat nan mau lian pui pui kan pu thleng thar dawn a ni zawk," a ti.

Mizo Hnam Rûna nimina inkhawmah thu sawiin Zoramthanga chuan, Health Care Scheme atana sum pûk an tum chungchangah mipui bum tuma thu chhum bung sawi an awm ṭhin niin a sawi a, "ADB-a central sorkarin sum pûk min phalsak tawh vbc. 1,000-a vbc. 720 hi central rulh tur a ni a, Mizoram sorkarin kan rulh ve tur chu 28% chauh a ni. In sak ṭhat nan mau lian pui pui kan pu thleng thar dawn a ni zawk," a ti a; ama ṭawngkam angin, 'Bang chhak sah thlâka bang thlang bel ang a ni' tia sawi an awm ṭhin thu a sawi.

CM Zoramthanga hian tun hnaia New Delhi-a sorkar laipui a dawrte leh an inkawm dante a sawi a; mi pawi­mawh tak tak a hmuhte chu Mizoram tana hmasawnna tur kawng hrang hrangin a sawipui tih a sawi a ni.

Zoramthanga chuan, India mi pawimawhte'n Myanmar buaina an ngaihven hle nia sawiin, "Myanmar buaina chinfel a nih theih nan India min mamawhzia thu ka sawi. Mizoram hi peace talk-a remna tluantling nei thei state kan ni a, kan remna leh muanna neih ang hi an mamawh a ni," a ti a; Myanmar buaina a tàwp theih nan India a inrawlh ngei a ṭul thu a thlen tih a sawi.

Chief Minister chuan, mithiamte thuràwn ang leh Zoram Medical College changtlung zawk neih a nih theih nan ZMC chu sorkar laipui kuta a awm theih nan Union Health Minister a sawipui tih sawiin, "Theihtawp lo chhuah a tum thu a sawi," a ti.