Serchhip District Hospital sakna tur hmun chungchang sawiho

Serchhip district bawrhsap Nazuk Kumar kaihhruaiin nimin khan DC conference hall-ah Serchhip District Hospital thar sakna hmun tur sawiho a ni a; Bûkpuia sak duhtu All NGO Coordination Committee aiawhte leh a hmun ngaia sak duhtu Joint Action Committee aiawhte an tel.

Nazuk Kumar chuan, PGCIL aṭanga CSR sum an hmuh chu hman loha lêt (lapse) palh thei a nih thu a sawi a, "Damdawi-in sakna hmun tur thlan fel vat a ṭul," a ti.

Pawl pahnihte ngaihdan behchhan hian Bawrhsap hriatpuiin NGO Coordination Committee leh JAC-te chuan thuchhuah inṭawm an siam a; "NGO Coordination Committee chuan District Hospital hi kan lo rèl tawh angin Bukpuiah ngei awm thei se kan duh a, chutih laiin, sorkarin khawi hmunah pawh dah se kan pawm thei a ni. Joint Action Committee chuan District Hospital hi a hmun ngaiah ngei sak a nih theih nan a theih ang angin hma kan la zel dawn a ni," tiin tarlan a ni.

Thuchhuah inṭâwmah hian NGO Coordination Committee aiawhin chairman Kawlṭhuama leh secretary PC Vanlalluna ten hming an ziak a; Joint Action Committee aiawhin chairman Kapliana Pachuau leh secretary Lalbiakdika ten hming an ziak. Hriatpuitu DC Nazuk Kumar leh additional DC Lalmuansanga Ralte ten hming an ziak bawk.

Ṭhutkhawmah hian Serchhip SDO (Sadar) Lalzikpuii, IPRO K Saitluanga leh SDC F Lalnisai te pawh an tel a ni.