LADC-in MJA tan Rs 1,50,000 a pe

Lai Autononmous District Council (LADC) sorkara Information & Public Relations enkawltu executive member Lalropuia Chinzah chuan nimin khan MJA, Lawngtlai District hruaitute hnenah LADC sorkarin Journalist Pension Fund atana a ruahman Rs 1,50,000 a hlân.

MJA, Lawngtlai District hian kum tin LADC aṭangin sum Pension Fund an dawng a, chungte chu Pension Scheme an siamah an member-te bank account-ah an khâwlsak ṭhin a ni.

Lalropuia Chinzah chuan, Journalist Pension Fund-ah sum tam zawk dah duh mah se, sum harsatna avangin an dah tam thei lo tih a sawi rualin, kum hmasaa dah aiin 50%-in a pun thu a sawi a; MJA, Lawngtlai District-in LADC sorkar aṭanga chhawmdawlna sum an hmuhte ṭangkai taka hmanga an member-te tan an khâwlsak chu lawmawm a tih thu a sawi bawk.

Lawngtlai District MJA hruaitute chuan, journalist-te chu khawsak harsa ve tak tak, theihtawp chhuaha chanchinbu hmanga ram tan rawngbawl hna thawktu an ni tih LADC sorkarin a hria chu lawmawm an tih thu an sawi a, "Mizoramah journalist pension nei thei awmchhun kan ni hi LADC sorkarin chanchinbumite a ngaih pawimawhzia tilangtu a ni," an ti.