Bawnghnute hmanrua pahnih hawng

Animal Husbandry and Veterinary (AH&Vety) minister Dr K Beichhua chuan nimin khan Nisapui khuaah bawnghnute dah khawlna, Milk Collection Centre leh kháwl hmanga bawnghnute vawn ṭhatna, Bulk Milk Cooler a hawng.

Nisapui Milk Collection Centre hi National Programme on Dairy Development kaltlanga Rs 2,00,000 leh MULCO-in Rs 1,30,000 a thawh hmanga sak a ni a; Bulk Milk Cooler chu bawnghnute litre 1,000 dawng a ni a, D&K Business, Aizawl aṭangin kum 2019 khan Rs 6,82,040 séngin lei a ni.

Milk Collection Centre-ah hian July 2022 aṭangin bawnghnute chhûn khawm ṭan a ni a, chawhrualin ni tin bawnghnute litre 237.17 chhûn niin, MULCO-in litre khat Rs 47.41-in a lei ṭhin. Nisapui Milk Producers’ Cooperative Society hnuaiah hnute sâwr lai bawng 38 leh bawng dang 16 a awm mek.

AH&Vety Minister chuan, thil hawn thar pahnih chu bawng vulhtute tan hmasawnna thar a nih thu a sawi a, "Covid-19 hripui lêng vangin hun harsa kan tâwk a, chuti chung chuan kan phâk tâwk tâwkah hma kan la ve zel. Kan hmalakna tlâwm tak takte Pathianin mal a sawm a ni," a ti.

Tun hmain Mizoramah Aizawl Polyclinic bak ran enkawlna damdawi-in a awm loh thu sawiin K Beichhua chuan, "Tunah chuan Siaha, Lawngtlai, Lunglei, Serchhip, Mamit leh Kolasib-ah ran damdawi-in kan nei tawh a, Champhaiah pawh rei lo têah kan hawng dawn," a ti a; district thar pathumah pawh hawn a nih theih nan ṭan lak a nih tur thu a sawi.

Dr K Beichhua chuan, Nisapui khuaa bawng vulhtute chu theihtawp chhuaha thawk tur leh harsatna an neihte a hnena thlen hreh lo turin a chah bawk. Inkhawmah hian bialtu MLA K Laldawngliana pawhin thu a sawi a ni.