Nuai 359.21 sênna Zophulpui Park-ah A nih dan tur angin hna thawh a ni lo - TZP

Tuipuiral Zirlai Pawl (TZP) hruaitute chuan, cheng nuai 359.21 sênna, Samthang Zophulpui Nature Park, Mizoram chu thawh zawh tawh anga tih ni mah se, a nih dan tur angin hnathawh a nih loh nasat thu an sawi.

TZP hruaitute hian nimin khan Aizawl Press Club-ah thuthar theh­darhtute an kâwm a; TZP president Zorammawia chuan, Zophulpui Nature Park chu Mizorama tourism-in hma a sâwn theihna tur leh Samthang khawtlang leh bialin eizawnna leh kawng danga hmasawnna an neih theihna tura ruahman a nih thu sawiin, "Tuna awm ang khi chu sum khawhralna mai a ni ang tih a hlauhawm tak zet," a ti.

Zorammawia chuan, kumin April 22 leh July 29-30 khan Zophulpui chu a hmunah an tlawh tih sawiin, "Hnathawh hrang hrangte kan en a, hnathawh chhe lutuk leh a nih dan tur ni loa thawh a tam lutuk a, a lung­chhiatthlak. Ngawihbopui chi niin kan ngai lo," a ti a; project kaihhnawihah hian Champhai DC pisaah ṭum thum leh Planning department-ah ṭum khat RTI Act hmangin zawhna an zawh thu a sawi.

Project-ah hian Champhai DC pisa chu implementing agency a nih thu sawiin TZP President chuan, "Hna­thawhah hian thil dik tâwk lo leh fel lo tam tak a awm ngei niin kan hria. Kan bial ro hlu tling tura kan ngaih, hetiang taka chhiaa thawh a ni hi lungawi har kan ti hle a ni," a ti.

TZP President chuan, RTI Act hmanga an zawhna chhan a nih danin, Zophulpui Nature Park chu thawh zawh tawh a ni tih lantirna comple­tion certificate chu February 25, 2022 khan pek chhuah a nih thu a sawi a, "Chutihlaiin, estimate-a tel ngei, la awm lo eng emaw zat a awm. Bungraw rawn thlen belhte pawh a la awm," tiin, DPR anga thawh loh a tam thu a sawi.

DPR anga thawh lohte chu DPR aia chhiaa tihdanglam vek a nih thu sawiin TZP hruaitute chuan, "Hnaah hian uchuak taka sum tihchingpen a awm ngeiin kan ngai. A nih tur anga ni pha lo leh thawh tur ang thawk lo leh bungrua awm tur awm kim si lo chunga completion certificate pek an nite hi kan lungawi lo tak zet. A mawhphurtu dan anga hrem an nih ngei theihna atan dan angin hma kan la dawn," an ti.

Zawhna chhangin TZP hruaitute chuan, Monitoring Committee-ah chairman tur chu bialtu MLA a ni a, Management Committee-ah chairman tur Khawbung BDO a nih thu an sawi a, "Bialtu MLA hian hriat a nei mumal lo. Management Committee-ah hian BDO chu chairman tur ni mah se, a chairman lo," a ti a; Samthang VC leh NGO hruaitute chu Managment Committee-ah an tel thu an sawi.

Thuthar thehdarhtute an kawm zawhah TZP hruaitute chuan Zophulpui Nature Park chungchangah hian Lokayukta-ah complaint an thehlut a ni.