Kanghmun - Lunglei inkar kawng chhiate October, 2022 chhunga siam zawh intiam

Lunglei district-a World Bank kawng, Kanghmun - Lunglei inkar km 100 - 160 thawmṭhat hnathawktu Bhavya Construction-te hnathawh chungchangah nimin khan district bawrhsap Kulothungan A chuan Lungleia thuthar thehdarhtute a kawm a; Bhavya Construction project manager Horendra Kumar Barua chuan kawng hi October 2022 chhung ngeia siamṭhat hna an zawh fel tur thu a intiam a ni.

Kulothungan A chuan, Lunglei district-a World Bank kawng thawmṭhat hnathawktu Bhavya Construction-te‘n an lo buaipui tawh chu a chhiat em avangin sorkar in Disaster Management Act hmangin Bhavya Construction-te chu Lunglei DC hmaa in lan tura koh an nih thu a sawi a; mipui, lirthei neitu leh district administration-te lungawina khawpa kawng siamṭha tur te, a hun chhunga kawng thawm hna an zawh fel a ṭul leh hun tiam chhunga an zawh loh chuan Mizorama hnathawk thei lo tura black list an nih theih thute a sawi.

Bhavya Construction project manager Horendra Kumar Barua chuan hna an thawh dan a tarlang a - kawng thawmṭhat (resurfacing) hna hi April 24, 2022 khan zawh a ni a, defect liability (an kawng siam chhe leh repair hna thawh) hi March 31, 2023 thleng a nung.

Fur ruahtui vangin kawng siam hi a chhe nasa hle a, kawng chhia thawmṭhat hna hi kalpui mek a ni. Team pathumah in ṭhenin kawng khuar zual laite chu lirthei tlan theih nan hnawh mek zel a ni.

Horendra Kumar Barua chuan hna hi October 2022 chhunga zawh hman ngei an tum thu a sawi.

Mizoram sorkar chuan PWD SE Robin Lalrinawma kaihhruai study team a din a, kawng chhiat chhan an zirchiang dawn a, report an thehluh hunah kawng chhiat chhan hriat theih an beisei.