Sorkarin a tih tam tak tih loh ringawt pawh kalphung thar a ni - PL Liandinga

ZPM consultant PL Liandinga chuan, kalphung thar an tih chu thil harsa a ni lo a, tuna sorkarin a tih tam tak tih ve loh ringawt pawh kalphung thar a nih thu a sawi.

Nimina ZPM pisaa inkhawmah thu sawiin PL Liandinga chuan, "Sorkarna chang turin kan inbuatsaih. Kan sorkar chuan kalphung tharin kal kan tum ang tih chu kan hre vekin a rinawm. Kalphung thar hi a harsa lo a, tuna kan sorkarin a tih tam tak hi ti ve lo ringawt ila, kalphung thar chu a ni mai," a ti.

PL Liandinga chuan, "Mipuite hlâwkpui chuan loh tur - mau te, kawng chhâwng te, lei verh te, cheng nuai thum sem te, board siam chawp enkawl zui lohte bakah, thil dang tam tak, mipui pawisa hekna tur tihbo a ni turte pawh kalphung thar a ni," a ti a; Pathian leh mipui zarah ZPM-in sorkarna a chan ngei pawh an inrin thu a sawi.

MNF sorkara thil hnawksak awm sa tih chhunzawm loh leh Mizoram sorkara la awm ngai lo - Chief Minister-in work department lian a chang lo turte chu kalphung thar a nih dawn thu sawiin Liandinga chuan, "Kamrul-a leh Pu Zoramchhana tel lohna sorkar, restricted tender ringawt hmanga rorel lohna sorkar hi mipui tan hmuh châkawm leh kalphung thar a ni thei," a ti.

PL Liandinga chuan, Val Upa Council uapna hnuaia sorkar a kal tur te, ZPM sorkar chhunga MLA hlawh a pung lo tur te, chief minister leh minister-te lirthei kawl tihtlem te, thlai thar leina tur sum budget-a a awm tur te, khaw hrang hranga village development council din turte chu kalphung thar a nih dawn thu a sawi bawk.

ZPM Consultant chuan, an inbuatsaihna atana pawimawh chu rinawm a nih thu sawiin, "Rinawmna nena kan tih si loh chuan kalphung thar hian awmzia a awm lo thei. Kalphung thar chhúngphùm pawimawh ber tur chu sum ngainat lutuk loh tum phawt a ni," a ti.