KHAWTHLIR

PUC-in thisen pe
Pachhunga University College NSS chuan PUC golden jubilee puala thisen pek rûnpui an neih ṭhin kal zelah nimin khan Civil Hospital, Aizawl tan thisen unit 72 an pe leh a, petute hi BA third semester-a Mizo, History, Political Science leh Geography zirlaite niin, mipa 57 leh hmeichhia 15 an ni. PUC hian academic session 2022-23 chhungin blood donation camp ṭum thum an huaihawt tawh a, thisen unit 285 an pe tawh a ni.

PC hruaitu thar
PC party elected office bearer-te chu president Vanlalruata kaihhruaiin nimin khan an pisaah an ṭhukhawm. President chuan PC general secretary atan mi paruk - B Vanlalhruaia, H Lalremsiama, Lalenkima Khiangte, Lalnunthara, Lalramthara leh VL Ṭhazova te a ruat bakah, secretary atan mi 13 leh joint secretary mi pasarih a ruat.

Kut silna pe
Rotary Club of Aizawl chuan sikul naupangte'n an sikulah fai taka kut an sil theih nan nimin khan Salem Veng Primary School hnenah washing station an pe a, kut sil dan dik an inzirtir nghal. Rotary Club, Aizawl hi kum 1992 khan din a ni a, Rotary International nen an inzawm a ni.

Tuitla ruang hmu
September 24, 2022 Inrinni zana Tuivawl luia tla hlum, Mosa Lalremtluanga (22), ITI Veng, Aizawl ruang chu nimin tlai dar 3 vel khan Tuivawl luia Phullen kài chhakah hmuh a ni. Nimin khan ruang zawngin mi ṭhahnem tak an thawk chhuak a ni.

Generator pe
National Highway and Infrastucture Development Corporation Limited chuan Tlabung Hospital hnenah 20Kv Kirlosker generator an pe a; nimin khan NHIDCL project coordinator Arvin Reddy-a'n Lunglei chief medical officer Dr LC Liana hnenah a hlan. Generator hi Rs 5,00,000 man a ni.

Cyber crime zirtir
Mizoram Legislative Assembly Secretariat-a thawkte pualin nimin khan Assembly Secretariat conference hall-ah Cyber Crime Awareness Campaign neih a ni a, CID (Crime) SP, Rahul Alwal hoin Cyber Crime Police Station, CID (Crime)-a mithiamte'n thil pawimawhte an zirtir.

Sipai lâkna tur hmun enfiah
Aizawl DC Dr Lalhriatzuali Ralte kaihhruaiin nimin khan sipai hotute leh khawtlang hruaitute'n October 4-9, 2022 chhunga Rajiv Gandhi Stadium-a sipai lâk rûnpui neihna hmun tur an enfiah a; hmalak tawhna leh bawhzui ngaite an sawiho nghal.

Kawng siam dawn
Hortoki leh Kawnpui inkar kawngpui chu SM Interior-in October 2022 thla chhung an siam dawn a, hei vang hian Inrinni leh Pathianni apiangin lirthei tlân phal a nih dawn loh thu Kolasib SP-in a tarlang. Harsatna tâwkte chu Kawnpui Police Station phone number 8974723770 be tura ràwn an ni.

Training tan
Nimin khan Lunglei DVO conference hall-ah Agriculture Technology Management Agency, State Agriculture Management & Extension Training Institute leh National Institute of Agriculture Extension Management ṭangkawp buatsaih Lunglei khawpui chhunga vawk vulh lama tuimi sawm bikte pualin karkhat chhung awh tur Skill Training on Rural Youth neih ṭan a ni. Training-ah hian mi 20 an tel.